Rockets lakah Lakers chungnung

Nimin zing NBA regular season inkhelah Los Angeles Lakers chuan Houston Rockets 120-102 in an hneh a, NBA champion hian season kal laiah khualmuala an feh chhuah ṭumin hnehna an la chang vek.

Lakers tan Anthony Davis chuan a hliam a dam tawh tih fiah nan point 27 a nei. Davis bakah hian LeBron James (18 points), Talen Horton-Tucker (17), Montrezl Harrell (16) leh Kyle Kzuma (13) ten an thlawh hlawk bawk a ni.

Rockets thiampuipa James Harden-a'n point 20 a neih bakah Christian Wood (23 points) te khel ṭha thawkhat mah se thlawptu an nei ṭha tawk lo a, quarter hmasa pahnihah an hniam zawk avangin a tawp thlengin an tho chhuak tawh lo.

Inkhel dangah Stephen Curry khel ṭha lo mah se Golden State Warriors chuan Toronto Raptors 106-105 in an hneh hram. Hun tawp hma second li chauh awm tawhah GSW tan Damion Lee chuan chakna basket a nei.

American guard Curry-a'n point neih tumin vawi 16 ngawt attempt a nei a, heng zinga vawi hnih chauh a hlawhtling - a basketball career a khelh chhiat ber ṭum a tawng, mimalin che chhe mah se a team erawh an vannei thung.

Oklahoma City Thunder tan Shai Gilgeous-Alexander-a'n point 31 a nei a, season kal laia point a neih hnem ber ṭum hian a team chu Brooklyn Nets lakah 129-116 in hnehna a chanpui. Utah Jazz pawhin Detroit Pistons 96-86 in an hneh.

Nimin zinga inkhel tur zinga mi Boston Celtics leh Miami Heat te erawh coronavirus vangin an inkhel thei lo.