Milan leh Torino bawk

Zanin dar 1:15 hian AC Milan chuan Coppa Italia last 16 khel turin Torino an mikhual dawn. Italian club pahnih hi Inrinni zan khan Serie A lamah an lo inhmachhawn tawh bawk a ni.

Stefano Pioli enkawl Milan hi 2-0 a chak hlim an ni a, zanina an inkhelhna tur hi San Siro tho a nih bawk avangin quarterfinal lut tur zawka rinkai an ni. Chutih rualin inelna hi knock out tournament a nih vang erawh chuan huaisen taka sawi lawk theih a ni lo.

Inrinni zan khan Zlatan Ibrahimovic chu hun tawp dawnah bench aṭanga luhtir a ni, coach Pioli-a'n a duh a nih chuan Ibra hi bul ṭantu zingah a telh thei tawh ang - Swede striker hi a chawlh rei avangin inkhelh tam a mamawh.

Milan manager Pioli chuan, "Player inhliam ṭhenkhat an lo kir mek a, chanchin lawmawm tak a ni. Ibra pawh inkhel turin a inpeih leh tawh, ani hi chuan match zawng zawng khelh mai hi a duh, amaherawhchu amah leh team tana ṭha ber tur kan ngaihtuah ang," a ti.

Ibrahimovic hi kum 39 mi ni tawh mah se a dam ṭhat phawt chuan chhawr tlak a la ni. Serie A season kal laiah pawh goal 10 a khung leh tawh a, coronavirus leh hliam vangin November thla tawp aṭanga a chawl chu tun hnaiah a lo kir ve leh chiah a ni.