FA Cup aṭangin Leeds United an tla

Knock out tournament a nih chuan beisei loh result kan hmu fo ṭhin. Premier League team hmuhnawm zinga mi Leeds United chu League Two club Crawley Town mualah 3-0 a tlawmin an zinkawng a tawp.

Pathianni zan inkhelah hun chanve hma lamin goal a lut lo, inkhel chawhnu lamah Crawley Town lamin Nick Tsaroulla, Ashley Nadesan leh Jordan Tunnicliffe te hmanga khungin an mahni aia team ṭha zawk an hneh.

English football-ah chuan Premier League a sang ber, a hnuaiah Championship, League One leh League Two te an awm. Leeds leh Crawley Town inkarah hian team 62 zet an awm, an dinhmun a inthlau hle.

Leedes manager Marcelo Bielsa-a'n an match hnuhnung kheltu player aṭangin mi pasarih ngawt a siksawi. Mahse, England midfielder Kalvin Phillips, Pablo Hernandez, Ezgjan Alioski leh club player man tam ber Rodrigo ten bul an ṭan.

EPL club hian an hun ṭha neih an chhawr ṭangkai thei lo a, Tsaroulla-a'n defender pathum a bum hnuah goal ṭha tak a khung bakah keeper Kiko Casilla tihsual vanga goal hnihna an chhuah vangin tho chhuak tur an awm tawh lo.

League Two club lakah EPL club an mualpho khat hle a, tun hnai kum 34 chhungin division sang ber club ami in division palina club si thum leh a aia tama an ngam loh lehna hmasa ber a ni hial.

Crawley manager John Yems chuan, "Hetianga hnehna chang tur hian kan thawkrim a, chuvangin kan chak hi hlim taka lawm tur a ni. Leeds United lakah khan keini lam chuan star player 11 kan nei," tiin a player zawng zawng an khelh ṭhat thu a sawi.

Chak lo Leeds midfielder Alioski chuan, "Inkhel kan ngai pawimawh a, hnehna chan ngei pawh kan tum. Hetiang ang result hi chu kan beisei a ni lo, manager in kan tana a pawimawhzia a sawi chunga kan chak lo hi a pawi," a ti.