Barcelona khelmualah PSG an chak

Tun season-a la tlawm miah lo Barcelona chu Nilaini zan khan Champions League inkhelah a vawi khat nan an tlawm a, an ngam loh chu an coach hlui Luis Enrique enkawl Paris St-Germain an ni.

Barca-in Ferran Torres hmangin goal hmahruai khung mah se, Senny Mayulu chuan PSG tan si phurh sutna goal a khung a, Goncalo Ramos chuan minute 90-naah chakna goal a khung zui.

PSG hi European football-a Barca khelmuala minute tawp bera chakna goal khung thei hmasa ber an ni - season hmasa treble champion hian UCL nomawi humhim an tum tih an pholang nawn.

Minute 90-naa chakna goal khungtu Ramos chuan, "Nomawi zawng zawng lak leh vek kan duh a, season hmasa kan hlawhtlinna avangin kan lungawi mai lo - a bak kan duh belh a ni," a ti!

A kim lo zawk

PSG-in player kim loin inkhel an hmachhawn a, tlarhmaah an first choice pathum Khvicha Kvaratskhelia, Ballon d'Or dawngtu Ousmane Dembele leh Desire Doue te an inlan thei lo vek.

Hei mai a ni lo - captain Marquinhos pawh hliam vangin a inlan thei lo a, warm-up an neih laiin midfielder Joao Neves a inhliam belh zui! A tawi zawnga sawi chuan PSG tan mangchhia a thleng a ni ber mai.

Hetiang boruak karah hian goal khung hmasatu pawh Barca an ni a, minute 19-naah Marcus Rashford chuan mual vei lam sir aṭangin ball a thlawh lut a, Torres chuan a lo tlawh lut.

Premier League-a chak hleithei lo Manchester United duh loh Rashford-a'n Barca-ah a hming a chher zel a, Catalan club tana a match hnuhnung parukah goal nga ngawt a thawk chhuak ta.

Beidawng lo PSG

Barca tan Torres-a'n goal a khung hma hian chance duhawm tak a nei a, PSG keeper Lucas Chevalier a bum vek hnua a khung ngei tur nia lang chu Bournemouth aṭanga PSG pantu centre back Illia Zabarnyi chuan a lo dang hman.

Mahse, a hnuah goal an khung ta tho a, Barca an phur. PSG an hnual phah lo thung - captain Achraf Hakimi-a'n uiawm taka freekick a hlah hnuah Mayulu a inlar a, Nuno Mendes siamsak chu goal-ah a chantir.

PSG-in chawlhlawk hmain si phurh an sut hman a, an thaw huai! Kum 19 mi Mayulu tan UCL-a goal hnih a khungna chiah a ni a, a goal hmasa zawk chu Munich final-a a khung kha a ni.

French club an vannei tel a, 1-1 a nih laiin Dani Olmo chuan khung ngeina chance nei mah se, Hakimi lo inrawlh hmanin, goal line hma hreatah a lo dang.

A tawpah mikhual

PSG an hmuhnawm tulh tulh a, champion lai ni chunga Barca khelmuala tlawm an duh lo - Lee Kang-in chuan ṭha zeta ball a lakluh hnuah, Barca defender hual vel kar aṭangin post a pet per dawp!

Barca fan-te thinphu a rang a, a tawpah goal an chhuah ta nge nge. Hakimi-a'n Ramos tana ball ṭha zet a pek chu Portuguese forward hian tlan luhpuiin, striker goal dik tak a khung.

Minute 90 a ni tawh a, Barca tan khungletna hun a awm tawh loh avangin PSG an chak. Star player rual awm lo chunga khel PSG-in fak an phu a, tun season UCL-a match hnih an khelhah an chak ve ve tawh.

French club hian an match hmasa zawkah Atalanta chu 4-0 in an sawp tawh a, UCL-ah pawh team hmachhawn châkawm lo ber pawl an nih chhunzawm zel. Barca erawh Newcastle United laka 2-1 a an chak hnuah mahni mualah an tlawm a, Hansi Flick-a'n hnathawh tur a la nei.