Goal 5, red card 3 leh football hmuhnawm

3rd October, 2025

Lawngtlaia GIG Motors MPL12 match hmasa berah Saikhamakawnin Mizoram Police 3-2 in an sawp a, goal nga a luh bakah red card pathum phawrh niin hun tawp ham rik thlengin inkhel a hmuhnawm hle. Lalsangzuala Hmar hote hian point thum hlu tak an hlawhchhuah avangin a sang paliah an inpet kai a, Police erawh relegation zone-ah an awm chhunzawm thung.

CYLA Ground-a inkhelah Saikhamakawn tan Suanngaihmuana'n goal hnih khungin Francis Malsawmkima'n goal khat a khung. 3-0 a nih laiin Police defender Laldinpuia bakah Saikhamakawn player pahnih JH Remlala leh K. Lalruatfela te hnawhchhuah an ni. Police-in an tamna a hmang ṭangkaiin Lalbiaktluanga leh Lalbiakhlua (Hlutea) te hmangin siphurh sut ṭhen mah se goal dang an khung belh thei ta bik lo.

Saikhamakawn an ṭha

Lalsangzuala Hmar hoten Police hnen nawn ngei an tum tih a lang a, ṭan phat aṭangin an goal bawh a na. Lalnunzira Sailo a che ṭha a, Police keeper F. Lalmuanawma an hna a siam a, a ṭhiante tan ball ṭha a siam bawk. Kimkima leh Amuana ten an chance neih ṭhat hmasak an khung lo.

SKK-in an nawr bet zel a, minute 27-naah Zira cross chu Kimkima'n goal-ah a chantir. Zira pawhin chance ṭha a nei tho a, goal ngei tura ngaihah a hlah a, Amuana pawhin hnai tak aṭangin a khung lo.

Second half-ah SKK an khel ṭha chhunzawm a, Zira penalty hlawhchhuah chu Amuana'n minute 49-naah a khung. Bethlehem Vengthlang tlangval Amuana'n minute 61-naah Kimkima siam a khung leh a, 3-0 a hma an hruai bakah inkhel an thunun bawk.

Police an huai

Saikhamakawn mifielder JH Remlala'n ṭul lo takin hun a khawhral a, Police defender Dinpuia nen intibuai zuiin buaina tenau a chhuak. Remlala leh Dinpuia te hnawhchhuah nghal ni a, defender Ruatfela'n yellow card vawi hnihna hmuin Saikhamakawnin player pakuain an helh phah.

Police-in an tamna an hmang ṭangkai a, minute 85-naah Lalbiaktluanga (Atluanga) ṭha taka lalutin chep tak kar aṭangin a khung. Goal mawi ber chu a ni lo a, goal pawimawh a ni thung. Lalbiaksanga Colney kaihhruai Police an phur a, chance an nei mawlh mawlh.

Minute 88-naah Lalbiakhlua (Biaktea) cross chu Hlutea'n a tauh lut a, Saikhamakawn an buai takzet tawh. Police-in na takin an nawr a, Malsawmfela'n ṭum hnih goal khung theihna hun ṭa a hlah a, Saikhamakawn an him hram. Coach Sanga hoten coach BS-a hote 3-2 in an hneh.