Point thum hmuh tum Dinthar FC

GIG Motors MPL12-ah vawiin chhun dar 12:00 hian CYLA Ground, Lawngtlaiah Mizoram Police leh Saikhamakawn te an inkhel dawn. Maimawms tan a sang pali zinga awm zel turin SYS FC hi hneh a ṭul a, chutihrualin Lunglei club tan relegate lo turin point hlawhchhuah ngei a ngai thung.

Dinthar hian MPL ṭantirh lamah che ṭha thawkhat mah se match hnuhnung pathumah chak hmel an hmu tawh lo a, table mawngphaha awm SYS lakah point thum hlawhchhuah ngei a ṭul. Maimawms coach Laldampuia chuan, "SYS hi zuam ngawt chi an ni lo a, an ṭang thei hle. Mahse, kan team dinhmun thlirin chak ngei kan mamawh a, point thum hmuh ngei tumin kan khel ang," tiin Vanglaini hrilh.

Dampuia hote hian SYS an hmachhawn hmasak ṭumin an player chhawr vak ngai lote an chhawr chungin 5-0 in an sawp a, hei vang hian vawiinah pawh inrintawkna an ngah phah khawp ang. Maimawms hliam vangin Jerry Lalchhanchhuaha leh Rohlupuia Pachuau te an hruai tel lo a, Lawngtlai zing zingah Samuel Lawmsiamkima, C. Lalnunthara leh Lallawmkima te an huai tel lo bawk.

Dinthar hi kim lo mah se tawnhriat nei ṭha player R. Laldanmawia, MS Dawngliana leh Lalkhawpuimawia te inlan thei dinhmunah an ding vek a; Danmawia leh Dawngtea te ringawt hian goal 10 an khung tawh. Tlarhnungah Lalhmangaihsanga a awm a, goalkeeper Joel B. Lalramchhana te an dam ṭhat bawk avangin an inringtawk khawp ang.

SYS lam hi an squad a chhah tawk lo a, kum lamah an naupan bawk vangin MPL khel tur chuan an la tlin lo deuh niin a lang. Lunglei club hi inelna ṭantirh lamah player tawnhriat ngah zawk HP Lalremruata leh T. Vanlalruata ten telpui a, midfielder pahnih bakah hian player dang paliin team an chhuahsan tawh. SYS an kim tawh lo.

Chutihrualin Lunglei club hian an match hnuhnung berah table chung bera awm Aizawl FC hun rei tak an chelh thei a, hei hian rawlthar rualte hi inrintawkna a pe ang. SYS hian point khat chauh an la hmuh avangin pressure an nei tawh lo a, Dinthar laka point hmuh hrim hrim an tum a nih chuan Maimawms tan helh an harsa khawp ang.