Aizawl FC = Chanmari FC

GIG Motors MPL12-ah Aizawl FC leh Chanmari FC te nimin tlai khan CYLA Ground, Lawngtlaiah an inhmachhawn a, goal awm loin an inhnehtawk. R. Lalruatfela hoten point 28 an hmu a, anmahni hnaih bertu Chanmarians aia point riata an hmuh tam zawk avangin league winner ni turin match liah point li chiah hmuh a ngai tawh.

I League club pahnih inkhel a nung ṭha a, chak an tum ve ve rualin chak loh an duh lo a, tlarhnung an tiphui ṭha. Nimin inkhelah goal hmuh tur a awm lo chungin goal chance erawh a awm nual a, vanneih ṭum ni se chak thei dinhmunah an ding ve ve.

Aizawl FC winger Sawma Tlangte cross chu khawtual tlangval T. Lalmuanawma'n hnai tak aṭangin a khung lo. Goalkeeper Vanlalhriatpuia a khel ṭha a, Chanmari winger Vanlalpeka pet a dan bakah PC Rosangzuala goal ban tauh per chu a goal hmaiin a beng chhuak hman bawk.

Hun tawp lamah Khawbel goal machine Zomuansanga'n hun ṭha bik a hlah a, goalkeeper Zothanmawia chiah a hmachhawn hnuah a khung lo. AFC striker Zomuana hian goal 10 a khung tawh a, Saikhamakawn striker Suanngaihmuana'n goal khat chiahin a pha tawh lo.

Hun tawp hma chiahin Chanmariin corner kick an hmu a, referee-in pet tir loin hun a ham tawp zawk. CFC official-te an lawm lo a, lungawi lo langsar assistant coach Malsawmkima Chhangte-in red card a hmuh phah. I League club pahnih an intluk tawk a, league winner tur a chiang hnai a, mah se MPL champion tur tak erawh hriatthiam a har tulh tulh.