Sofia Kenin a chak lo

Australian Open champion lai Sofia Kenin chu nimin khan Maria Sakkari lakah 6-2, 2-6, 0-6 in a chak lo a; American star hi Abu Dhabi Open quarterfinal aṭanga vuak tlak a ni.

Kum 22 mi Kenin hi seeded pakhatna pek niin champion tura rinkai a ni phak. Mahse beisei angin tournament a hmachhawn lo, a match hmasa pathumah harsa takin a chak hram hram vek.

Nimina quarterfinal inkhelah set hmasa ber chu awlsam takin a la. Amaherawhchu set hnuhnung pahnihah erawh Greek nula Sakkari a chesual duh lo a, service nei ṭha zawk Sakkari hian aces vawi kua siam chungin hnehna a chang.

Seeded pakuana Sakkari hian Pathianni khan seeded pangana Garbine Muguruza chu 7-5, 6-4 in a lo hneh tawh bawk. Wimbledon leh French Open champion hlui laka zahngaihna a lantir loh ang bawkin Australian Open champion hneh zui lehin semifinal a lut.

Last 16 inkhel dangah Elina Svitolina chu set hnuhnung berah 3-5 in hnufual hman mah seeded 17-na Ekaterina Alexandrova chu 6-2, 6-7 (7/5), 7-6 (10/8) in a hneh let. Svitolina hian nizan khan Veronika Kudermetova hmachhawn zui lehin result kan hre hman lo thung.