Napoli tan Hojlund a vul

Rasmus Hojlund-a goal hnih khung hmangin Napoli chuan Sporting Lisbon chu 2-1 in an hneh. Antonio Conte enkawl team hian Champions League point thum hlu tak an hlawh chhuak a ni.

Diego Maradona Stadium-a inkhelah Naploi an hmuhnawm, midfielder ṭha Kevin de Bruyne-a'n amah vengtu ho kar aṭanga ball a tal chhuah pui hnuah defender pahnih inkarah a lir lut a, striker Hojlund chuan chak taka umin goal hmahruai a khung.

Second half-ah Sporting lamin penalty aṭangin an sut - Luis Suarez chuan khungin si phurh a sut a, Portuguese club tan point hmuh beiseina a siam nghal bawk. An match hmasa ang bawkin Naples club hi chesual thei dinhmunah an ding ve bawk.

Mahse, hun pawimawh laiah player ṭha neih ṭangkaina a lang. Manchester City midfielder hlui De Bruyne chuan box chhungah ball ṭha a thawn lut a, striker Hojlund hi sang taka zuangin an chakna goal a tauh lut.

Manchester United chhawr duh loh Hojlund kha a ni a, tunah chuan nuamti takin Italian club tan a khel mek. Man City tana vanglai hmang zotu De Bruyne leh Man United midfielder hlui Scott McTominay ten an chawm a, striker hriam leh hlauhawm a ni leh der tawh.

Napoli coach Antonio Conte chuan, "Kevin hi chu a danglam, kan hnena a rawn kal duh pawh kha thil lawmawm tak a ni tawh. Inkhelh reng duh mi a ni a, thil ṭha duha a tuihalna chu tunah khan a takin kan hmu.

"Ball a chan tawh hi chuan thil eng emaw ṭha leh hmuhnawm tak ti turah kan lo beisei ṭhin a, kan beisei thlawn lo. Ani bakah player dang pawh an khel ṭha takzet, kan zavaia thawmrim rah a ni.

"Hojlund khelh dan khan min tilawm bawk, goal khung turin a theihna zawng zawng a hlan. Tharum a ngah a, a hunah sang takin a zuang thei bawk, kum 22 mi chauh a la nih avangin zir tur a la nei a, tunah pawh theihna sang tak a nei tawh," a ti.

Napoli hian an match hmasa zawkah Manchester City an hneh lo, tunah erawh an phu ang ngeiin hnehna an chang. Kartawpa Genoa nen Serie A match an khelh tur lam an ngaihtuah leh thei tawh ang.