Haaland-a goal hnih a tawk zo lo

Erling Haaland-a'n goal hnih khung mah se an hum zo lo a, an mikhualna ramah Manchester City chu AS Monaco nen 2-2 in an inhnehtawk, hun tawp dawna penalty vangin point hnih an hloh tiin a sawi theih.

Haaland a inkhelh hi chuan goal a khung mai ṭhin. Stade Louis II-ah pawh hun a mamawh rei lo, minute 15-naah Josko Gvardiol-a ball pek a khung, ball sawt kang hi khawih harsa tur takin awm mah se Haaland hian laklawh nei loin a khung.

Mahse, mualneitu lamin Jordan Teze hmangin an chhanglet, box pawn aṭangin goal kilah a pet lut pawp a, goalkeeper Gianluigi Donnarumma tan ban phak a ni lo, chiang leh mawi zetin a lut.

Man City lamin ball chang tamin inkhel an thunun zui - forward Phil Foden vanneih zan ni se la chuan goal a khung a rinawm, mahse remchang ṭha tak a neih chu a hlah tlat, a hnuah erawh Haaland bawk a inlar.

Box chhungah Haaland hi Mohammed Salisu-a'n a veng a, a sir lam aṭanga Nico O'Reilly-a ball cross chu Haaland hian a lo tauh lut, goal hnihna khung tur hian amah vengtu a zuan khum hneh hle a ni.

Goalkeeper ṭha Donnarumma-a'n ṭha takin Maghnes Akliouche-a khung tur dansak mah se, hun tawp dawna Eric Dier-a penalty erawh a dansak thei tawh lo, khualmualah point khatah an lungawi a ngai ta zawk.

Man City manager Pep Guardiola chuan, "Monaco kha an inveng thiam takzet. Ligue 1 an khelh dan leh Champions League an khelh dan phung chu a danglam daih, kan khelh dan an lo zir lawk ṭha hle tih chu chiang takin kan hmu," a ti.

Goal hnih khungtu Haaland pawhin hmasawn an ngaih thu sawiin, "A tir lamah kha chuan kan khel ṭha viau a, second half-ah erawh kan tha a zuai deuh. Hnehna chang tur chuan tun aia nasa zawk khan kan nawr a ngai," tiin a sawi.

Norway international striker Haaland hian Champions League match 50 a khelh aṭangin goal 52 a khung tling der tawh a, kum 25 mi chauh a la nih avangin European football inelna sangah hian a la khung belh zel pawh a rinawm.