Dortmund-in goal li an khung

Bundesliga-a tlawm la nei lo Borussia Dortmund-in Champions League lamah pawh hnehna an chang a, Nilaini zan khan Athletic Bilbao chu 4-1 ngawtin an sawp - UCL match-ah a zawnin goal li an khung.

German club hian an UCL match hmasa zawkah Juventus hmachhawnin, goal li bawk an lo khung tawh a, mahse, hemi ṭumah erawh goal li tho an chhuah ve avangin 4-4 in an inhnehtawk.

Niko Kovac-a enkawl Dortmund tan Daniel Svensson chuan minute 28-naah goal hmahruai a khung a, minute 50-naah Carney Chukwuemeka chuan a chhunzawm.

Bilbao hian minute 61-naah Gorka Guruzeta hmangin khung ve leh mah se, awmzia erawh a nei thui lo a, Dortmund lamin minute 80 hnu lamah goal hnih dang an khung zui a, an chak chiang.

Minute 82-naah yard 20 vela hla aṭanga Marcel Sabitzer-a 'shot' chuan Serhou Guirassy perin, goal-ah a lut a, hun pek belhah bench aṭanga luhtir Julian Brandt chuan chak nemnghehna goal a khung bawk.

Dortmund hian Bundesliga-ah match nga khel tawhin, an la tlawm miah lo. Match hmasa berah FC St. Pauli (3-3) chu inhnehtawkpui mah se, a hnu match liah an chak vek a, match ngaa la chak vek Bayern Munich chiah an phak lo.

DFB-Pokal lamah pawh vawi khat inkhel tawhin an chak a, UCL match hnih an khelhah an la tlawm lo bawk - tun season-ah German club hian match riat khel tawhin an la tlawm miah lo tihna a ni.