Juventus an chak thei lo

Tun season inelna hrang hranga match sarih an khelh tawhah Juventus an la tlawm lo a, mahse, inchhuanna tur erawh a awm lo - match sarih zinga match liah hian an khingpui an inhnehtawkpui a, Serie A lamah palina an ni mek.

Nilaini zan khan Juve hian khualmualah Villarreal chu Champions League match khel turin an lenchilh a, 2-2 in an in draw - UCL match hnih an khelh tawhah an khingpui an la draw ve ve a, point hnih chiah an la nei tihna a ni.

Mualneitu Villarreal tan Georges Mikautadze chuan minute 18-na lekah goal hmahruai a khung a, mahse, second half-ah Juventus-in Federico Gatti-a overhead kick hmangin si phurh an sut a, bench aṭanga luhtir Francisco Conceição-a'n hmahruaina goal a khung zui.

Inelna hrang hranga an match hnuhnung pathuma draw result neitu Juventus hi an chak ve dawn ta niin a lang a, a phur pawh an phur hman. Mahse, minute 90-naah Italian club hi velh ṭahin an awm.

Season hmasa lama Juventus-a loan-a lo khel tawh Renato Veiga chuan Villarreal tan si phurh sutna goal a khung a, 2-2 in inkhel a tawp - match hmasa zawka 1-0 a Tottenham Hotspur ngam lotu Spanish club tan result ṭha a ni.

Hetihlai hian Juventus tan erawh Champions League-a an record duhawm lo belhchhahin a awm zel thung. European club football inelna sang bera an match hnuhnung 10-ah vawi hnih chiah an la chak - vawi nga draw neiin, vawi thum an tlawm tawh.