Newcastle United an chak nuamsa

Tun season-a beisei ang result nei hleithei lo Newcastle United an chak ve ta a, an mikhualna ramah Union Saint-Gilloise chu 4-0 ngawtin an sawp - kum 2003 hnua Champions League away game-a an chak leh hmasak ber a ni.

Magpies coach Eddie Howe-a'n team nem zawk hmachhawn dawn mah se, an chak theih loh thaibo tura chak an mamawh avangin a squad neih ṭhat ber a thawhchhuahpui a, a tisual lo.

Belgian club lakah Nick Woltemade chuan goal hmahruai a khung a, a goal khung dan erawh inchhuanpui viau tur a awm lo. Sandro Tonali-a shot chu German striker hian a lo dang per lut.

USG-in Adem Zorgane hmangin si phurh sutna remchang nei mah se, Nick Pope chuan ṭha zetin a dang a, hun tawp nan minute hnih chiah a awm tawh tihah Magpies-in penalty an hlawh chhuak zui.

Anthony Gordon chuan penalty hi harsatna nei loin goal-ah a chantir a, minute 64-naah penalty hmang vekin a belhchhah bawk - Harvey Barnes-a'n minute 80-naa goal a khung chuan chak tur a chiang tawh a, point thum nen lawm takin Magpies an haw.

Tun season-a league match ruk an khelha vawi khat chiah la chak Magpies tan chuan UCL-a hnehna chan hi inrintawk nan a pawimawh a, Pathianni zan dar 6:30-ah league match khel turin Nottingham Forest an mikhual zui ang.