Goal 759 khung thei Cristiano Ronaldo!

Cristiano Ronaldo-a'n club leh ram tana a goal khung belhkhawm chu 759 a ni ta a, official goal khung hnem lamah Josef Bican a nihrual. Juventus star hian a rei thei ang football khelh chhunzawm zel a tum.

Pathianni zan Serie A inkhelah Juventus chuan Sassuolo 3-1 in an hneh. Allianz Stadium a inkhelah Old Lady tan Danilo, Aaron Ramsey leh Ronaldo ten goal khat ṭheuh an khung a, Gregoire Drefel goal khungin mikhual team mualpho tur a hliah phak lo.

Andrea Pirlo nauten AC Milan an hneh hnuah beiseina an nei sang zual a, Sassuolo laka point thum hmu tur erawhin vanneihna an mamawh tel. Hliam dam hlim Alvaro Morata chu bench lamah dah la niin, hun chanve hma lamah goal a lut lo.

Chawlhlawk hma chiahin Pedro Obiang chu Federico Chiesa laka a chet dan mawi lo vangin red card pek a ni a, inkhel chawhnu lam chu player kim loa an khelh a ngaih phah - minute 50-naah Juve lamin Danilo hmangin goal hmahruai an khung zui.

Mikhual lamin beisei loh takin Drefel hmangin si phurh an sut a, an ṭang tluan thei dawn niin a lang hman. Mahse, hun tawp dawn lamah khel ṭha zawk Old Lady lamin Ramsey leh Ronaldo hmangin point thum an hlawh chhuak.

Hnehna an chan hnuah Juventus manager Pirlo chuan, "Kan tan chuan hnehna pawimawh tak a ni. Inkhel harsa leh khirhkhan taka point thum hmuh hi chu a hlu, kan chunga awmte um zel kan nih avangin chesual hman kan ni lo.

"Juve kan nih avang hian inkhel boruak sangah pawh kan chak thei. Tun hnaiah inrintawkna kan neih belh nasa a, kan hma hunah eng nge lo thleng zel tur tih pawh inringtawk tak chungin kan hmuak thei ang," a ti.

A zawna seoan kua ngawt Serie A champion ni thei Juve hi table-ah palina an ni mek. Match 16 an khelh aṭangin point 33 an hmu, hmahruaitu Milan chuan match 17 aṭangin point 40 an nei tawh thung - nomawi inchuh boruak a sang zel dawn.

Italian champion nih tum ngam zinga mi Inter Milan chu an mikhualna ramah AS Roma nen 2-2 in an inhnehtawk a, team pahnih hian an chunga awm Milan an phak lohna kar a zau ta hret.

Rome khawpuia inkhelah Inter tan Milan Skriniar leh Achraf Hakimi ten goal an khung, mualneitu lamin Lorenzo Pellegrini leh Gianluca Mancini te hmanga khungin point khat ve ve in an insem.

Inter manager Antonio Conte chuan, "Inkhel a zawh meuh kha chuan rilru a hrehawm hle, inelna hautak tak hmachhawn laia point hloh hi a pawi," a ti. Inter hi season hmasa khan pahnihna an ni a, match an khelh zawh vek hnua Juve an phak lohna chu point khat chauh a ni.