Atletico-in Dembele an lalut dawn

Lyon sporting director Juninho chuan an forward chhuanvawr Moussa Dembele-a'n chhuah a dil thu a sawi a, "Moussa hi min hmu turin a lo kal a, tun hi team a thlak hun niin a hria a, a phurna ngai ang khan a phur tawk tawh lohah a inngai a ni," a ti. 

Juninho chuan sawi zawmin, "Dembele hian chhuah min dil ka lo ring lawk miah lo a, ka player duhzawng tak a ni. Mahse, kan hnena cham duh lo player thla nga dang kawl chhunzawm hi thil tih chi a ni lo. 

"Atletico nen inbiakna kan kalpui a, Moussa hian a inrempui tawhin ka hria," a ti a, Leicester City striker Islam Slimani an rim zui tur thu a sawi bawk. Algeria international hian season hmasa kha Monaco-ah khelin match 19-ah goal kua a khungsak. 

La Liga hmahruaitu Atletico hian an striker Diego Costa an chhuahtir a, Spain international hmun ruak luah tur hi an zawng mek - he thuziak i chhiar meuh chuan Dembele hi an lalut fel tawh hial mai thei. 

Khawthlang media-te chuan Spanish club hian loan-a lalut turin Dembele hi inremna an neihpui tawh niin an sawi a, an duh chuan a ngheta pound maktaduai 30-a an lakluh theih dan tur an ziak tel bawk. 

Kum 24 mi Dembele hian tun season-ah Lyon tan match 16 khel tawhin goal khat chiah a la khung a, French striker tan season ṭha a ni lo - 2018-19 season kha French club-a a hun hmasa ber niin match 46-ah goal 20-a khung a, season hmasa khan match 46-ah goal 24 a khung bawk. Striker theihna nei sang tak a ni tih chu a hriat. 

Atletico hian naktuk zing dar 2:00-ah league match khelh tur an nei dawn a, Sevilla an mikhual ang - La Liga-ah hma an hruai mek a, anmahni hnaih bertu Real Madrid aiin point khat lekin an sang. 

Chutihrual chuan Diego Simeone-a enkawl team hian Real aiin match thumin an khel tlem a, Inrinni zan khan Athletic Bilbao nen inkhel tura tih ni mah se vur a tlak nasat avangin an inkhel thei tawh lo bawk.