Dintharin kawng dik an zawh

Dinthar FC-in MPL hmasa ber player R. Laldanmawia leh top scorer MS Dawngliana te an kawl a, player tawnhriat nei ṭha pahnih hmang hian nimin khan SYS FC 1-0 a hnehin point thum hlu tak an hlawh chhuak. GIG Motors MPL12-ah Maimawms hian point 18 an hmu a, pathumnaah awmin, pahnihna Chanmari FC nen an point hmuh zat a inang chiah.

CYLA Ground, Lawngtlaiah Dinthar leh SYS ten inkhel nung ṭha tak an khel a, Lunglei club-in tun inelnaah point khat chauh la hlawh chhuak mah se awlsam taka hneh theih tur team erawh an ni lo. SYS hian Lunglei player tawnhriat nei ṭha TS-a Zadeng an ziahluh belh a, Dinthar lakah pawh an ṭangkaipui hle.

SYS hian goal chance pawh an nei hmasa a, Lunglei Ramthar tlangval Johny Malsawmkima'n box pawn aṭangin ṭha takin pet mah se Joel B. Lalramchhana'n a dansak. TS-a Zadeng pawhin box chhungah ṭha takin a luhpui a, goal zawnah a pet thei lo.

Chance ṭha ber erawh Vanlaldinpuia'n a nei a, SYS winger Dinpuia hian through ball um lutin khalh hnai aiin pet nghal a thlang a, goal-ah kawh takin pet mah se Dinthar keeper Ramchhana'n hming ṭhat nan a hmang.

Dinthar tan winger C. Ramnunpuia (Tea Chinzah) a hmuhnawm a, minute 44-naah a ball fing chu LH Lalchawimawia'n changin, Lunglei Zobawk left back hian ṭha zetin a cross lut a, R. Laldanmawia'n goal-ah ṭha zetin a tauh. Danmawia goal-a lut tura ngaih a ni a, mah se goal lo palh thei a nih avangin Dawngtea'n goal line aṭangin a tauh lut.

Second half-ah goal mamawh SYS aiin Dinthar an khel ṭha zawk a, Tea Chinzah leh Lalrintluanga (Tutua) ten SYS tlarhnung ṭhiatin Chawimawia'n goal-ah kawh zetin pet mah se SYS goalkeeper Lalhruaitluanga Kawlniin (Bawihpuia) a dang.

Dintharin goal hnihna khung tumin an nawr na a, Dawngtea freekick pet chu Tea Chinzahin tauh ṭha mah se goal pawnah chiah a kal. Laldampuia hoten second half-ah harsatna an tawk lo a, Dawngtea goal hmanga 1-0 a chakin point thum hlu tak an hlawh chhuak.

MPL12-ah semifinal khelh inchuh boruak a nung thar hle. Aizawl FC-in chhiarkawp dan angin semifinal an lut tawh a, I League club dang Chanmari FC erawh Dinthar FC, Saikhamakawn leh MLS FC te nen knockout stage khelh an inchuh dawn.

Maimawms hian Saikhamakawn FC, Aizawl FC, MLS FC leh Chanmari FC te an hmachhawn dawn a, hmabak a hautak dawn hle. An khelh leh tur pathuma result ṭha an neih loh chuan match tawp bera Chanmari nen an inkhel result-in an hmalam hun a hril thei dawn. MPL12 round tawp berah Zo Clasico khelh a ni dawn a, en châkawm bik a ni ang.