Forest ṭantuten manager ban an duh

Nottingham Forest-in September 9, Thawhlehni khan Nuno Espírito Santo thlak nan Ange Postecoglou an la lut a, thla khat pawh a tlin hmain club ṭantuten Tottenham manager hlui hi ban an duh.

Forest hi season liam ta khan Nuno hoa an chet ṭhat avangin Europa League khel turin an tling a, mah se Europe inelnaah result ṭha an nei lo. Ningani zan khan City Ground-ah mikhual FC Midtjylland lakah 3-2 in an tlawm. Forest ṭantuten, "Naktuk zingah an ban dawn che," tiin Postecoglou an au el.

Postecoglou hote hian October 5, Pathianni zan dar 6:30 hian Newcastle United an hmachhawn dawn a, hmabak a harsa dawn. Magpies hi Arsenal lakah 2-1 in vanduai mah se kar laihawl khan Champions League-ah Union Saint-Gilloise 4-0 in an sawp a, an insiamrem leh tawh.

Forest tan Newcastle United hneh hi a harsa dawn a, tuna an record thlir phei chuan a harsa lehzual dawn. Postecoglou hnuaiah match ruk khel tawhin Forest hian chak an la nei lo a, kum 100 chhunga Forest club-a a vawi khat thlenna a ni.

Postecoglou chuan, "Hmuh vawi khatnaah min ngaina nghal lo mah se min la ngaina thuai ang," tiin sawi mah se thla khat pawh tling loah ban duh thawm a ri ring hle. Kum 2013 khan Alex McLeish chuan ni 40 chhung chauh Forest a enkawl a, Pathianni zana Magpies laka an chak loh dan a zirin Postecoglou hi hei aia hma hian ban theih a ni.