Real Madrid tan thawh a hun

Zanin dar 12:30-ah Real Madrid chuan league match khel turin Villarreal an mikhual dawn a, Atletico Madrid laka mualpho hlim Real Madrid tan tun hi insiamṭhatna hun a ni.

Real hian an league match hmasa parukah hnehna chang vekin, an kaltluang viau a, mahse, season bul ṭan ṭha lo zawk Atletico Madrid an tawn meuh chuan dawl zawrin an zawr - 5-2 ngawtin Xabi Alonso leh a naute an tlawm.

Madrid tlawm laiin Barcelona erawh an lo chak thung a, Catalan club hian Real Madrid tlan pelin, table chung ber an luah ta daih - an club hal em em Atletico laka an tlawmna chuan an hmelma dang lawmna a siam tel a ni ber!

Alonso leh a naute Champions League lamah an inhrithla zui a, an mikhualna ramah Kairat chu 5-0 ngawtin an sawp. Kylian Mbappe-a'n a changtupa a nihzia pholang nawnin hattrick a siam.

Hetihrual hian Real hian player inhliam an ngah hle - Trent Alexander-Arnold, Dani Carvajal, Ferland Mendy leh Antonio Rudiger te chu hliam vanga chawl mek an ni a, zaninah an inlan theih a rinawm lo.

Chuti a nih chuan right back chhawr tur nei lo Xabi Alonso hian 'back three' a hmang mai ang nge, lungawi lo nia an sawi Federico Valverde hi right back-ah a phuahchawp mai dawn? tih chu zawhna awm mek a ni.

Valverde hi Carlo Ancelotti khan position hrang hrangah a chhawr ṭhin a, central midfield-a khelh nuam ti ber mah se, right-winger, right-back leh right-sided midfielder te angin a chhawr vek!

Mahse, Valverde hian Alonso hnuaiah right back-a khelh a duh lo nia sawi a ni a, Spanish media-te chuan Alonso nen an inkara boruak awm angin an tarlang.

Valverde erawhin an puhna hi phain, "Mite chuan an duh duh sawi rawh se - mahse, engtik lai mahin he club tana khelh hi ka duh lo ngai lo. Ka theihna zawng zawng Real tan hian ka hlan ṭhin a, hliam nei chung pawhin, engmah sawisel loin ka khel mai ṭhin," a ti.

Uruguay international chuan sawi zawmin, "Coach nen kan inkarah eng buaina mah a awm lo a, chu vang chuan ka khelh duhna tak position pawh inthlahrung lo takin ka hrilh ngam. Chutihrual chuan khawi position-ah pawh ka khel thei tih erawh chiang takin ka tilang.

"He club tan hian ka theihna zawng zawng ka hlan ṭhin a, ka tizel bawk ang. Ka theihna sang ber pawh a tawk zawh loh chang a awm tih chu ka hria a, mahse, ka inthlahdah phah dawn lo. Min mamawhna hmun apiangah ka khel ang," a ti a, club-in buaina an neih loh thu a sawi.