Bayern-in Deutsche Bank Park tlawh dawn

Bayern Munich-in zanin dar 10:00 hian Bundesliga-ah Eintracht Frankfurt an hmachhawn dawn. Deutsche Bank Park-ah hian Bayern hian kum 2022 hnuah chak hmel an la hmu lo a, record siam zo hlim Harry Kane hoin an record ṭha lo hi thai bo an tum ang.

Kum 32 mi Kane hian kar liam ta khan Werder Bremen lakah goal hnih khungin Bayern Munich tan goal 100 a khung a, match 104 chauh a mamawh avangin Europe league sang pangaa goal 100 khung tura hun mamawh rei lo ber a ni. Cristiano Ronaldo leh Erling Haaland ten Real Madrid leh Manchester City tana goal 100 khung turin match 105 ve ve an mamawh.

Kane hian kar lai hawl khan Champions League-a Pafos 5-1 an sawp ṭumin goal hnih a khung leh a, Bavarians tan goal 102 a khung tawh. Engand captain hian Bundesliga-ah season thumna a la khel chauh chungin goal 72 a khung tling der tawh a, Allianz Arena-ah a hun tawp thlenga a cham a nih chuan Robert Lewandowski record goal 312 pawh a khum thei hial ang. Chutihrualin Bundesliga-a goal khung tam ber record Gerd Muller-a siam goal 365 erawh khum a harsa dawn.

Bayern leh Kane hian record lam ngaihven hman an ni lo a, palinaa awm mek Eintracht Frankfurt an hmachhawn dawn avangin kartawp inkhel turah an insawrbing a ṭul. Pafos an hneh ṭumin Chelsea aṭanga loan hmanga an hawh Nicolas Jackson pawhin goal a khung ta a, Vincent Kompany hoten Frankfurt lakah point thum hlawhchhuah ngei an tum dawn a ni.