Verstappen a hlauhawm - Norris

Formula 1 champion tuma inum boruak a sang a, tun kartawpah intlansiak a awm leh dawn. Pathianni zan dar 5:30 hian Marina Bay Street Circuit-ah Singapore Grand Prix tlan a ni dawn, car intlansiak sang ber hian ngaihven a hlawh ang.

Intlansiak hnuhnung pahnihah Max Verstappen a chak ber a, a chunga awm McLaren driver pahnih Oscar Piastri leh Lando Norris te tan ngaihṭha taka awm mai mai theih a ni tawh lo, hmabak an la neih nual avangin an dinhmun a him lo.

Norris chuan, "Tun hnaiah Red Bull hian hma an rawn sawn em em a, mit a hmuh theih khawpin hma an sawn. Tawnhriat nei ṭha tak Max-a an nei bawk a, team leh driver ṭha tak an ni chu inhrilh nawn ngai loin kan hre vek.

"Keini pawh team ṭha tak kan ni a, hei leh chen hi tluang leh ṭha takin kan kal thei. Season tawp boruak san vanglai kan tawng chho a ni a, kan dinhmun pawh a la inthlak kual leh thei dawn hle," tiin a sawi a, tun kar tawp atan beisei an neih thu a sawi bawk.

Verstappen tan Singapore hi hmun ṭha a ni ngai meuh lo, boruak lum tak hnuaia intlansiak ṭhin niin hnehna a la chang ngai lo - season hmasa khan Norris hian hnehna changin a hnungah Verstappen hi a thleng, kuminah pawh en bik an hlawh leh ang.