Juventus mualah AC Milan

AC Milan chuan hna hautak thawh tur an nei chhunzawm - Serie A champion Napoli an hneh hnua an hna hmasa atan Juventus an lenchilh dawn; Pathianni zan dar 12:15 hian Juventus an lenchilh ang.

Serie A match nga an khelh tawh chinah Milan hian point 12 hmuin hma an hruai mek, an hnuaia mi Napoli leh AS Roma te nen an point a inzat. Juventus nen an inthlauhna pawh point khat chauh a ni a, champion tum inum an intiat tawk hlawm hle.

AC Milan coach Massimiliano Allegri hian tun hmain Juventus a lo enkawl tawh ṭhin, atan chuan Allianz Stadium hi hmun thar a ni dawn lo - sulhnu tam tak a lo hnutchhiah tawhna hmun a ni a, a tan chuan a lunglen thlak ve bawk ang.

Season bul an ṭan niah Milan hian Cremonese an hneh lo a, a hnuah erawh an insiamṭha tawh hle. Coach Allegri bakah Adrien Rabiot chu Juventus hrechiangtu a ni a, anni pahnih hi Milan ta an nih tawh avangin Old Lady ṭhat tawk lohna lai hre tur an ni.

Igor Tudor-a enkawl Juventus hi zuamsual theih tur tak erawh an ni, player ṭha leh tawnhriat nei tam an kawl nual, an khelh fuh ni chuan Milan chauh pawh ni loin European club lian dang hneh turin theihna an nei, an boruak erawh a fuh reng bik lo thung.