Semenyo a ṭha tak tak

Bournemouth-in nipui bazarah player pali ngawt £40mtd chuang vekin an hralh a, mah se an player neih ṭhat zawng an la hralh lo. Cherries hian Antoine Semenyo an la kawl a, English forward hmang hian Zirtawpni zan khan Fulham an lehthal.

Vitality Stadium-ah mikhual Fulham tan Ryan Sessegnon-a'n minute 70-naah goal hmahruai khung mah se Cherries an tho chhuak tho. Minute 78-naah Semenyo-a'n mual vei lam aṭangin a la lut a, box chhung thlenga khalh lutin, angle awm tawh lohna aṭangin si phurh sutna goal a khung.

Bournemouth forward Justin Kluivert-a'n minute 84-naah box pawn aṭangin hmahruaina goal mawi zetin a khung a, injury time-ah Semenyo-a'n a tawp a khar. Cherries forward hian Ben Doak aṭanga a ball hmuh chu 'cool' zetin a khung a, 3-1 in hnehna an chang.

Semenyo-a'n tun season Premier League-ah goal ruk a khung der tawh. Cherries hi table-ah palinaah an awm a, pathumnaa awm Tottenham nen point 14 ve ve an hmu. Spurs hian Leeds 2-1 in an hneh thung a, chakna goal hi minute 57-naah Mohammed Kudus-a'n a khung.