Vinícius lansarh hun a thleng

Atletico Madrid laka an mualpho hnua an La Liga match hmasa berah Real Madrid an chak a, an mikhual Villarreal chu 3-1 in an sawp - Real tan Vinicius Junior chuan goal hnih a khung a, Kylian Mbappe-a'n goal khat a thawh bawk.

Villarreal tan Georges Mikautadze chuan 2-0 a nih laiin si phurh a sut ṭhen a, mahse, fullback Santiago Mourino hnawhchhuah zui a nih avangin Villarreal tan thawhleh ngaihna a awm tawh lo.

Real-in hnehna an chan avangin table chung ber an luah a, mahse, nizan khan Barcelona inlan ve lehnghalin, an chak chuan Real tlanpelin a chung berah an awm leh ang - an result kan hre hman lo.

Hei le Vini

Tun season-a Real inkhelah Mbappe hlir a langsar a, mahse, Inrinni zan erawh Vini lansarh zan a ni - first half-ah erawh player langsar bik an awm lo a, Real-in Villarreal tan harsatna an siam theih loh avangin 0-0 in first half a tawp.

Mahse, second half-ah Real an insiam rem a, khelmual an luh leh aṭanga second 90-na lekah Vinicius Jr chuan hmahruaina goal a khung nghal - a shot chu Santi Comesana chuan lo dang perin, Villarreal goalkeeper Arnau Tenas tan dan theih a ni lo.

Minute 69-na a ni a, Vini bawk kan hmu. Rafa Marin nen ball an inchuhna lamah uar takin a tlu a, referee-in penalty spot a kawk. Brazilian forward hian penalty hi a chhuih lut a, 2-0 a ni.

Hlauthawng suh u!

Real-in 2-0 in hmahruai mah se, Santiago Bernabeu-ah Real-in chak an tum ngam a, Madrid club ṭantute an hlauthawng - minute 73-naah an hlauhthawnna chu belhchhahin a awm zui.

Jude Bellingham-a'n keeper chauh hmachhawn chunga a khung loh hnuah Georgia striker Mikautadze chuan si phurh a sut ṭhen! Mahse, minute li hnu lawkah Mourino chu Vinicius lakah foul-in, a yellow card pahnihna a hmu a, hnawhchhuah a ni.

Player tam zawka khel Real-in Mbappe hmangin an goal thumna an khung a, an mikhual lakah 3-1 in an chak. French striker hian tun seaosn-ah match 10 a khelh aṭangin goal 14 a khung ta!