Alex Pereira-a'n a title a la let

MMA fighter rothap Alex Pereira-a'n a kawnghren hloh tawh nei let tura hun a mamawh zat chu minute khat leh second 20 chauh a ni - nimin khan Magomed Ankalaev chu technical knockout hmanga hnehin, UFC light heavyweight title a la let.

Kum 38 mi Pereira hian March 8, 2025 khan Ankalaev hi Las Vegas khawpuiah hmachhawnin, unanimous decision hmangin a hneh lo a, UFC light heavyweight title a kawl lai chu a hloh.

Pereira hian Ankalaev laka a tlawm hma hian a title hi vawi thum ngawt a humhim hman a, a tlawmngai hle. Nimin zing khan Las Vegas khawpuiah vek phuba lakna remchang a nei a, champion dik tak a nihzia a pholang.

Brazilian fighter Pereira chuan, "Phuba lak hi thil ṭha a ni ngai lo. Kan intawn hmasak khan dinhmun a ṭhat loh thu ka sawi a, mahse, tuman min awih lo.

"Hetianga awlsama hnehna ka chang hi mak ka ti hran lo a, kan fight hmasa zawkah khan awlsam takin ka chak thei tih ka hmu tawh - kan intawn hmasakah khan ka nuamsam lo a, mahse, chhuanlam siam kha ka duh lo a ni," a ti a, a dam ṭha pangngai chu Ankalaev tan hneh chi a nih loh thu a sawi.

Pereira hian MMA-ah professional fight vawi 16 nei tawhin, vawi 13 hnehna a channa chiah a ni a, vawi thum a tlawm thung - UFC middleweight-ah a lo champion tawh bawk.