Inter Milan an chak tluang leh ta

Season bul ṭan fuh lo mah se Inter Milan an insiamṭha leh tawh, inelna hrang hranga an match hnuhnung pangaah hnehna an chang vek - Inrinni zan khan Cremonese chu 4-1 a hnehin point thum hlu tak an hlawh chhuak.

San Siro-a inkhelah, mualneitu Inter Milan hian a khat mawi tawkin goal an khung. Captain Lautaro Martinez-a'n khung ṭanin Ange-Yoan Bonny, Federico Dimarco leh Nicolo Barella ten goal khat ṭheuh an khung belh.

Argentine striker Martienz hian Inter Milan tan goal 158 a khung tling ta a, club tana goal khung tam pangna dinhmun a luah. Hun tawp dawnah Cremonese hian Federice Bonazzoli-a goal khat hmangin a chhanglet a, mahse awmzia a nei phak tawh lo.

Inter Milan coach Cristian Chivu chuan, "Kan thil tum ti hlawhtling turin ka naute hian an thawkrim em em a, khelmual chhunga an rawn chet dan khan min ti lawm takzet, hmasawn ngaihna lai erawh kan la nei.

"Duhthusam ang thlapa khelh theih chu ni lo mah se, tun ṭuma kan khelh dan kha chu a ṭha thawkhat hle. Serie A season bul kan ṭan chhoh dan kha thlir kir ta ila, tuna kan awmna hi chu lawmawm tak a ni," tiin a sawi.

Inter Milan hian match ruk an khelh aṭangin point 12 an hmu a, table-ah palina an ni mek - an chungah hian AS Roma, Napoli leh AC Milan te an awm, anni ho nen hian an point hmuhzat a inang a, mahse Chivu-a naute hi match khatin an khel tam thung.