MPL12 : Thla khat hnuah an dik ṭan

GIG Motors MPL12 hi Santosh Trophy leh I League vangin October thlaah zawh tum a ni a, hei vang hian club-ten hahchawlhna leh insiamremna hun an nei meuh lo. Tun ṭuma inelnaa hian club insiamrem hma an vannei a, round 10-ah erawh club hrang hrang an inremdik ṭanah a ngaih theih.

Aizawl FC-in bul an ṭan ṭha a, match 10 aṭangin vawi riat chakin point 26 an hmu tawh. I League club hi an san fal avangin league winner an nih ngei a rinawm a, mah se champion erawh a la chiang lo. R. Lalruatfela hote hi hliamin a tibuai a, season ṭantirh lam aiin an tla hniam leh tawh zawk.

Lawngtlaia team an intluk tlanzia hmuh khan club dang pasarihte erawhin hma an sawn hret hret niin a lang. Round 10 hma khan round tinah goal 10 a lut tling vek a, Lawngtlaiah erawh Saikhamakawn leh Mizoram Police inkhelah goal nga a lut chungin match li aṭangin goal riat chiah a lut. Goal a luh tlem a, insawp an awm loh hian team an intluk tlangah a ngaih theih.

Round li khelh tur a la awm a, fixture pawh a hmuhnawm dan tur chiahin a awm. Table hnuaia lama awm team-in a hnuai lama awm team an hmachhawn tam a, a chung lama awmin a chunglama awm team an hmachhawn tam. Hei hian table-ah nghawng lian tak a nei thei dawn a, table hnuai lama awm tan a sang palia inpetkaina remchang tak a awm dawn tihna a ni.