Relegation battle: SYS vs Police

GIG Motors MPL12-ah vawiin tlai dar 3:00 hian SYS FC leh Mizoram Police te an inkhel dawn a, MPL aṭanga tla tur zawnna a ni dawn. SYS hian tun inelnaah point khat chauh an la hmu a, chutihrualin point sarih hmu tawh Police an hneh a nih chuan relegation playoff khelh tal an beisei thei ang.

Lunglei club hi kum lamah an naupang a, an tlan theih avangin Police-in khelh an harsat. An intawn hmasak ṭum pawhin 1-1 in an inhnehtawk a, Police hi a suttu zawk an ni. Hei bakah hian SYS hian relegate an tum bik lo a, MPL-a tawnhriat nei ṭha tawh TS-a Zadeng bakah nikum lama an player Andreas Lalhmingmuana Vanhawi te an ziahluh belh.

Dinthar nena an inkhelh ṭum pawhin SYS hian hma an sawn tih a hmuh theih a, Police erawh an training lai player-te an la chhuak a nih loh chuan player lamah chuan danglamna a tam thei lo thung. Chutihrualin Police hi player tawnhriat nei ṭha awm khawmna a ni a, Saikhamakawn nena hun tawp lama an khelh dan ang kha an chhunzawm thei a nih chuan Lalbiaksanga Colney hoten point thum an hmu thei ang.