A dam a nih chuan Neymar tan hmun a awm - Ancelotti

Brazil coach Carlo Ancelotti-a'n World Cup 2026 inbuatsaih turin squad a puang a, South Korea leh Japan hmachhawn tur player a koh zingah Neymar a tel lo - atan kawng a inkhar tihna erawh a la ni bik lo.

Kum 33 mi Neymar hi hliam vangin a chawl mek a, kuminah hliam vawi thum a tawrhna a ni tawh. A chawr chhuahna Santos lama a kir leh hnuah nun thar neih a beisei a, mahse a duh ang tak chuan a la inkhel thei chuang lo a ni.

Paris Saint Germain tana a hun hnuhnung lam leh Al Hilal a zawm hnuah Neymar hi a buai zual a, a inkhel tam lo takzet. Nakkum maiah World Cup khelh a ni dawn, ram hrang hrangin inelna lian atan team an din mek.

Brazil coach Ancelotti chuan, "Tunlai football khelh danah chuan Neymar theihna ang hi chu thup theih a ni lo a, chutihrualin a theihna hmang chhuak tur chuan a taksa dinhmunin a zir ve a ngai thung, inkhel turin 100%-in a inpeih a nih ngat chuan, ram tana inlan turin a tan hmun a awm.

"Neymar nen pawh kan inbia a, inelna ropui hmachhawn thei turin inbuatsaihna hun a la neih thu ka hrilh. Midang pawhin Brazil tan inkhel leh ngei se an duh a, nakkumah World Cup ṭha taka a khelh theih nan beiseina nen kan thlir," a ti.

Brazil hi World Cup 2026 khel turin an tling chiang tawh, inbuatsaih nan friendly match an khel chho dawn. Tournament neih hun hi nakkum ni mah se hun hi a tam lutuk tawh lo, team nghet nei tur chuan insiamrem a hun chho tawh hle.

Brazil Squad:

Goalkeeper: Ederson (Fenerbahce), Bento (Al-Nassr), Hugo Souza (Corinthians).

Defender: Carlos Augusto (Inter Milan), Eder Militao (Real Madrid), Caio Henrique (Monaco), Vanderson (Monaco), Douglas Santos (Zenit), Fabricio Bruno (Cruzeiro), Gabriel Magalhaes (Arsenal), Beraldo (Paris Saint Germain), Wesley (Roma).

Midfielder: Andre (Wolves), Bruno Guimaraes (Newcastle), Joelinton (Newcastle), Casemiro (Manchester United), Joao Gomes (Wolves), Lucas Paquetá (West Ham).

Forward: Estevao (Chelsea), Gabriel Martinelli (Arsenal), Igor Jesus (Nottingham Forest), Luiz Henrique (Zenit), Matheus Cunha (Manchester United), Richarlison (Tottenham), Rodrygo (Real Madrid), Vinícius Júnior (Real Madrid).