Uzbekistan coach thar Cannavaro

A vawi khat nana World Cup khel tur Uzbekistan chuan an coach atan Fabio Cannavaro an lakluh thu an puang a, Italian defender ropui hian World Cup-a Uzbekistan hruai thlengtu Timur Kapadze a thlak ang.

Kum 52 mi Cannavaro hian inkhelh a chawlhsan hnuah coaching luhchilh zuiin, Chinese Super League club Guangzhou Evergrande aṭangin a zinkawng a zawh ṭan a, Al Nassr, Tianjin Quanjian, China, Serie B club Benevento, Serie A club Udinese leh Croatian club lar Dinamo Zagreb te a lo enkawl tawh.

World Cup 2006-a Italy champion puitu defender hian Guangzhou a enkawl laiin Chinese Super League leh FA Super Cup-ah nomawi a chawipui a, kum 2016 khan China League One-ah Tianjin a champion pui bawk - manager a nih hnuah nomawi dang sawi tur erawh a nei lo.

Nikum khan Spanish second division club Deportivo La Coruna nen indawrna nei mah se, Croatia lamah kalin Dinamo a zawm a, mahse, match 14 chiah a kaihruai hman tihin, April thla khan ban a ni.

Kum 2006-a Ballon d'Or dawngtu Cannavaro hian Guangzhou a enkawl lai khan kum khatah euro maktaduai 12 hlawhin, CSL-a hlawh hnem ber record a lo siam tawh a, Uzbekistan-ah hian eng zat chiah nge a hlawh dawn hriat a ni lo.

Dinamo-ah khan kum khatah €1.5mtd hlawhin, a coaching staff-ten €500,000 an hlawh nia sawi a ni a, Uzbek media ṭhenkhatten an ram team a enkawl hian kum khatah €4mtd a hlawh dawn niin an sawi.

Mahse, Uzbekistan Football Association first vice president Ravshan Irmatov chuan, "Media sawi hi a dik lo a, Cannavaro hian an sawi ang zahve pawh hi a hlawh lo. Mahse, a hlawh zat puangzar lo tura kan inrem avangin, a hlawh zat tak sawi erawh ka tum lo," a ti.

Cannavaro hian assistant coach Eugenio Albarella, fitness coach Francesco Troise leh goalkeeping coach Antonio Chimenti te a chhawm tel a, World Cup-a Uzbek hruai thlengtu Timur Kapadze chu Assistant Coach a ni zui dawn niin an sawi.

Uzbekistan hian Manchester City defender Abdukodir Khuanov, Turkish Super Lig club Çaykur Rizespor centre back Husniddin Aliqulov, İstanbul Başakşehir midfielder Abbosbek Fayzullaev te ho an nei a, captain Eldor Shomurodov hi AS Roma striker niin, Başakşehir-ah loan-in a khel mek thung.