O'Reilly-a'n Reece James a thlak

Manchester City defender Nico O'Reilly chu a vawi khat nan England squad-ah koh a ni a, hliam vanga inhnukdawk, Chelsea captain Reece James aiah koh a ni.

Inrinni zan khan Chelsea chuan Premier League champion Liverpool mikhualin, 2-1 in an chak a, he inkhelah hian captain Reece James chu a inhliam.

Hliamin a tihbuai ngun ve tak James hian inkhelh zawhah social media lamah a inhliam thu hi a tarlang a, Chelsea captain inhliam hi O'Reilly tan lawmna a chang ta a ni ber.

Hetihrual hian Reece James inhliam vanga koh O'Reilly hi left back a ni a, Thomas Tuchel-a'n a squad-ah right back chu Tottenham Hotspur player Djed Spence chiah a kawl tihna a ni.

Kum 20 mi O'Reilly hi Manchester City academy chhuak niin, kum riat mi a nihin Manchester khaw club hi a zawm tawh a, season hmasa khan first team tan inlan ṭanin, inelna hrang hrangah match 21 a khel a, goal nga khungin, assist vawi hnih a nei.

Tun season-ah pawh O'Reilly hian match kua a khel leh der tawh a, goal khung a la nei lo a, assist vawi khat a nei thung. English defender chuan, "England tana koh ka ni mai hi mak ka ti deuh a, ka beisei phak bak a ni," a ti.

England hian tun international break-ah hian World Cup qualifier match hnih an khel dawn a, October 9, Ningani zanah Wales mikhualin, October 14, Thawhlehni zanah Latvia an lenchilh zui ang - group hmahruaitu niin, World Cup khel thei dinhmunah an ding mek.