Depay-a passport an ruksak!

Netherlands tana goal khung hnem ber record chelh mektu, Brazilian club Corinthians tana khel Memphis Depay chu a passport ruksak a ni a, hei vang hian Dutch national team a zawm thei rih lo!

Depay hi Brazil Serie A club Corinthians player a ni a, ruahman dan chuan Pathianni tlai khan Brazil chhuahsan a, Netherlands squad zawm tur a ni a, mahse, a passport an lo ruksak a ni.

Dutch football-a thuneitu sang ber, Royal Dutch Football Association (KNVB) chuan thuchhuah siamin, "Depay hian a rang lama squad a zawm theih nan theihtawp a chhuah mek a ni," an ti a, he thuziak i chhiar meuh chuan squad hi a zawm tawh mai thei.

Netherlands head coach Ronald Koeman chuan, "He thil thleng hi Memphis tan chauh ni lo, keini tan pawh a pawi hle. International football match khelh dawn chuan squad kim ṭhapa training ṭan theih hi duh dan a ni.

"Chutihrual chuan, kan thuhnuaia awm lo thil tam tak hi a awm ve a, Memphis hian a rang lama squad a zawm vat theih kan beisei," a ti a, a forward chhuanvawrin squad a la zawm thei lo chu pawi a ti hle.

Kum 31 mi Depay hian Corinthians tan season duhawm tak a hmang mek a, tun season inelna hrang hrangah match 39 khel tawhin, goal riat a khung a, assist vawi sawm a nei tawh.

Thla hmasa lawk khan Netherlands tan Lithuania an hmachhawnna inkhelah goal hnih khungin, ram tan match 104-a goal 52 a khungna chiah a ni a, ram tana goal khung tam ber ni ṭhin Robin van Persie (50 goals) a khum.

Netherlands hian October 9, Ningani zanah Malta lenchilhin, World Cup qualifier an khel dawn a, October 12, Pathianni zanah Finland an mikhual zui ang - match hmasa zawkah hi chuan Depay tan inlan a harsa mai thei.

Koeman-a enkawl Netherlands hi group C-ah awmin, match li khelh tawhah point 10 neiin hmahruaitu an ni mek a, pahnihna Poland nen an point hmuh zat inang mah se, match khatin an khel tam thung.