MPL12 semifinal khelh tur zawnna Zanin dar 7-ah Chanmari Vs Kanan
GIG Motors MPL12-ah zanin dar 7:00 hian Chanmari FC leh Kanan FC nen RG Stadium-ah an inkhel dawn a, semifinal khel tur zawnna tiin a sawi theih ang. I Day Football champion Chanmari FC meuh pawh knockout stage khel turin an dinhmun a chiang lo a, Samson Ramengmawia hote an hneh lo a nih phei chuan an dinhmun a derthawng lehzual ang.
Chanmari hian hliam vangin an player pawimawh Aron Vanlalrinchhana an chhawr thei lo a, Cherhlun tlangval hi Lawngtlaia Aizawl FC nen an inkhelh ṭumin an inhliam. Serchhip tlangval KC Malsawmsanga pawhin hliam vang thoin training a la zawm thei dawn lo a, a inlan a rinawm lo zawk.
Mahse, Chanmari hian season liam taa I League an thlen theihna tura player pawimawh Lalrokima an lalet a, Lengpui tlangval hi inlan thei dinhmunah a ding. Rochhingpuia chuan, "Aizawl FC kan hmachhawn ṭum anga kan khelh chuan Kanan hi kan hneh theih mai ka ring a, mahse coach thar hnuaia khel an nia, khelh erawh an awlsam dawn lo," tiin Vanglaini a hrilh.
Chanmari buaina ber chu goal khung thei bik player an nei lo a, tun dinhmuna goal khung tam pahnih Lalruatsanga leh Aron-a ten goal thum ve ve chauh an khung. Chutihrualin a êng zawnga thlir erawh chuan kil tin aṭangin goal an khung a, an squad a chhah ṭhat avangin Kanan FC tan pawh inzir lawk a harsa ang.
I League club khingpui tur Kanan FC-in Samson Ramengmawia an lakluh hnuah an game-ah hmasawnna hmuh tur a awm ngei a, mahse point lamah erawh hmasawnna a zuang bik lo. Chawngthansanga hnuaiah Kanan hian 0.88 point an hmu a, Samson-a hnuaiah match tinah point khat an hmu thung.
Kanan hian coach thar hnuaiah chak hmel an la hmuh loh bakah semifinal khelh an tum avangin Chanamri lakah chak ngei an tum dawn a, attacking football an khelh ve ve a rinawm avangin inkhel a hmuhnawm dawn. Samson hian tlarhmaah Lalthanpuai (Tepuia), Lalthanzuaia (TZ-a), F. Lallawmkima, Lalthuthlunga te an nei a, Chanmari tlarhnung tan a awlsam lo ang.
Zanin inkhel hian team pahnih hmalam hun a hril a, entu lam pawh an tam ve ve tura ngaih a ni. Samson-a hnuaia Kanan khelh hmasak berah entu an ṭha nghal a, zaninah pawh ṭawiawmtu an neih ṭhat a rinawm. Chanmari lamin entu lamah hma an sawn chak thei lo a, ṭan an la hret a nih loh chuan RG Stadium-ah Kanan aiin ṭantu an nei tlem zawk ang.