Ronaldo-a'n chawimawina a dawng

Portugal Football Globes 2025-ah Cristiano Ronaldo chuan Prestige Globe Award chawimawina a dawng. Ronaldo hi kum 22 chhung Portugal national team tana a hnahthawh ṭhat avangin chawimawina hi hlan a ni.

Kum 40 mi Ronaldo chuan, "Ka hnathawh min hriatpui avangin ka lawm a, hei chawimawina hi ka chhuang hle a ni. Ram tan kum 22 chhung theihtawp ka chhuah tawh a, ka rilru put hmang a la ngai reng. Tun dinhmun ka thlen theihna tura ka thawhpui coach leh player zawng zawng chungah ka lawm hle," tiin a sawi.

Ballon d'Or vawi nga dawng tawhtu Ronaldo chuan, "Ka nun phungah hian hmachhawn thui tak nei loin ni tin zela theihtawp chhuah ṭhin mi ka ni. Ni tin hian training nuam ka ti em em a, tuna ka hmachhawn chu Portugal match hnih khelh tura chak a, World Cup khel tura tlin a ni," tiin a sawi a, World Cup-a thil thleng tur erawh hunin a rawn hril ang, tiin a sawi thung.

Portugal hian October 11, Inrinni zan dar 12:15 hian Ireland an hmachhawn dawn a, October 14, Thawhlehni zan dar 12:15-ah Hungary an hmachhawn leh ang. Roberto Martínez hote hian Armenia (5-0) leh Hungary (3-2) ten an hneh tawh a, group F-ah pakhatna dinhmun an luah mek.

Ronaldo hian match hmasa pahnihah goal a khung ve ve a, ram tan goal 141 a khung tawh. Inelna hrang hrangah Portugal captain hian goal 946 khung tawhin goal 1000 khung turin goal 54 chauh an mamawh. Season liam ta khan Ronaldo hian goal 35 a khung a, tun ang zela goal a khung a nih chuan season tharah chuan a tum ram a thlen theih a rinawm.