David Raya hlawh an punsak

Arsenal chuan an goalkeeper David Raya-a hlawh an punsak a, a punna zat tak tarlan ni lo mah se khawthlang media rintlak BBC chuan Premier League goalkeeper zinga hlawh tam zingah a tel niin an ziak.

Gunners leh Raya inremna hi nipui bazar laia mi tawh kha a ni a, mahse an puangzar hran lo. A contract neih rei zawng, kum 2028 thleng erawh pawh sei a ni hran lo, tuna chawlhkar khata £100,000 erawh an tipung ngei thung a ni.

Premier League goalkeeper zingah Liverpool si ban nghak Alisson Becker leh Aston Villa keeper Emi Martinez te chu hlawh tam niin, kar khatah £150,000 an hlawh phak, an hlawh ang zat hi Raya pawh an pe ngeiin a rinawm.

Spain international Raya hian a tirah chuan Brentford aṭangin Arsenal hi loan hmangin a zawm phawt a, kum 2024 khan an lei nghet. Premier League season hnuhnung pahnihah khan Golden Glove a dawng a, tun season pawh bul a ṭan fuh chho leh hle.

Raya bakah hian Arsenal chuan an forward Leandro Trossard-a hlawh pawh an tihpunsak a, ani pawh hi kum 2027 thleng inremna an neih sa chu pawhsei ni lo mah se a hlawh erawh a pung, an inremna hi official-a puanzar erawh a ni bik lo.

BBC tarlan dan chuan Jurrien Timber leh Bukayo Saka te pawh contract thar ṭha leh mawm zawk zawrh an ni a, inremna pawh an neih ngei a rinawm. Tun hnai khan William Saliba leh Gabriel Magalhaes te pawh kum 2029 thleng atan inremna an lo neihpui tawh a ni.