Thla 18 atan McGregor an hrem

Conor McGregor chu thla 18 chhung infiamna huanga inlan thei lo tura hrem a ni - Combat Sports Anti-Doping (CSAD) dan leh hrai a zawm loh avangin hremna hi a hmachhawn a ngai ta a ni.

CSDA dan ang chuan, an hnuaia infiammite chuan an dinhmun leh chetvelna hrang hrang te chu hrilh nawn kher ngai loin thuneitu lamah an hriattir ṭhin tur a ni. Mahse, McGregor hian nikum khan endikna vawi thum ngawt a hmachhawn lo.

Kum 2021 July khan Dustin Poirier nen an inbeih ṭumin McGregor hi a ke ruh a tliak, a hnu lamah fight a la hmachhawn leh lo. Hremna hi a tirah chuan thla 24 chhung tura tih a ni a, mahse hliam vanga a dinhmun an ngaihtuah tel hnuah thla 18 atan an tih tawisak.

UFC website tarlan dan chuan McGregor hian hrem a nihna hi a pawm a, hrem a nihna hi nikum September 20 aṭanga chhut ṭan kha niin, nakkum March 20 thleng a ni ang, hremna a hman zawh meuh chuan kum 39 a lo hnaih tawh dawn a ni.

Kum 2026 June 14 hian US president Donald Trump piancham pualin UFC neih turin ruahmanna a awm, he hunah hian UFC president Dana White chuan Conor hian tel a duh a, a phur hle niin a sawi - mahse thu chiang erawh a la awm lo thung.