Season tawpah Alba a chawl dawn

Barcelona defender hlui Jordi Alba chuan tun season tawp rualin inkhelh a chawlhsan dawn. Alba hi Inter Miami tan a khel mek a, a hun tawp chu Major League Soccer (MLS) ah a hmang dawn tihna a ni.

Kum 36 mi Alba hi a vanglai chuan khawvela left back ṭha zinga mi a ni phak - Barcelona tan hlawhtlinna hrang hrang a chan bakah an ram Spain chu Euro 2012 khan a champion pui bawk.

Alba chuan, "A hun chu a lo thleng ve dawn ta, ka nuna thawnthu thar ka ziah hun a hnai ta hle. Football khelh zinkawng chu tun season tawp rual hian a zo ve tawh ang, hlim leh lawm tak chungin boot ka khai ve thei dawn ta a ni," tiin a sawi.

Spain tana match 93 a khelhsak hnuah kum 2023 khan international football a chawlhsan a, club tan pawh a hun hnuhnungah Inter Miami tan a khel - MLS club tan hian Lionel Messi, Sergio Busquets leh Luis Suarez te nen an khel ho a ni.