Football agent ten FIFA khin an tum

FIFA chuan football agent te hlawh neih theih chin a duan thar avangin agent langsarte chuan dan anga hmalak an tum thu an sawi a, agent zingah hian Mino Raiola, Jorge Mendes leh Jonathan Barnett te an tel avangin an thawm a ring hle. 

September thla khan FIFA chuan agent-te hlawh khuahkhirh an tum thu hi an lo puang tawh a, player hralhtu club-a agent te hlawh chu player hralhna aṭanga 10% aia sang lo turin dan an siam. Barnett chuan, "Fair taka thil kalpui kan duh. FIFA hian kan hlutna hria se, zah takin min dawr se kan duh a ni," a ti a, football khawvela thuneitu sang ber chet danah an lungawi lo. 

Player tam tak zing­ah Gareth Bale leh Eng­land goalkeeper Jordan Pickford te pawh enkawltu Barnett chuan, "FIFA hian agent te hnathawh tak tak hi a hre lo. FIFA aiawh tumahin ka office-ah min dawr lo bawk. Player-te hi an ngaihdan zawt ula, agent lam an ṭang vek ang. "Player-te hian agent-te fee hi engtiklai mahin an sawisel ngai lo. Kan theihtawpin he thutlukna hi kan bei let dawn a, a ṭul a nih chuan khawvela court zawng zawngah hian kan kal kual mai ang," a ti!

Association of Foot­ball Agents life president Mel Stein chuan, "FIFA thutlukna chhanglet turin kan thawkho dawn a ni. FIFA hnenah thu kan thlen dawn a, kan vaia ngaihdan sawihona remchang siam turin kan ngen dawn a ni," a ti a, FIFA hotute titipui ngei an duh thu a sawi. Hetihlai hian FIFA chuan an dinna ngai renga an din thu an sawi a, an ruahmanna chu awmze nei zawka thil kalpui tumna a nih thu an sawi bawk. FIFA chuan, "Nikuma football agent hlawh zat belhkhawm hi pound maktaduai 498.2 a tling a, kum 2015 nena khaikhin chuan a let liin a tam a ni," an ti a, agent te hlawh tam uchuak tih reh an tum.