A chung berah Chanmari FC

Mizoram Premier League Season 5-ah round khat chiah khelh hmabak a awm tawh a, Ningani zana Ramhlun North 2-0 a hnehtu Chanmari FC chu hmahruaitu an ni.

Chanmari coach Lalsang-zuala Hmar-in chhawr theih tura Ivorian forward Leonce Dodoz leh Nigerian defender Ugochukwu Godswill te a neih hnuah inkhel thunun chungin hnehna an chang. Chanmari FC tan Vanlalbiaaa Chhangte-in minute 36-naa goal hmahruai a khung hnuah Malsawmfela'n man of the match atana thlan Mabiaa penalty hlawhchhuah chu minute 40-naah goal-ah a chantir leh bawk.

Ramhlun North FC-in point 12 an hmuh tawh a, match khat khelh tur la awmah table mawngphaha awm Zo United nena inthlauhna chu point thum ni mah se head to head-ah anni aia MPL tawnhriat nei nghah club hi an tluk loh avangin tla thei an la ni.

4-3-3 a fuh

Chanmari FC-in Champhaia Bethlehem Vengthlang 4-1 zeta an sawp hnuah match nga an khel leh tawh a, hneh loh tawng lo mah se vawi thum lai an khingpuite an draw avangin an khelh danin Chanmarians an tilawm pha lo.

Ramhlun North an hma-chhawn ṭumin Dodoz leh Ma-biaa ten tlarhmaah Sawmfela an kar cheh a, midfield-ah R. Malsawmtluanga, Rochhing-puia leh Lalrinchhana te an awmin an formation chu 4-3-3 a ni. Chanmari tan 4-3-3 formation hi thil thar a ni lo a, amaherawhchu player paruk hi a ruala an luh vawi khatna a ni.

Chanmari boss Sanga tihfuh ber chu an player thar Isak Vanlalruatkima aiah MPL-a tawnhriat nei ṭha Mabiaa Chang-te an dahlut a, Hriangtlang tlang-val hi danglamna thlentu a ni.

Mabiaa show

Chanmari FC-in first half an thunun a, midfielder MS-a leh Chhinga ten ball an sem a, Rinchhana'n a hna tur chin a ti bawk. Tlarhmaah Dodoz chevel a mawi a, Ivorian forward leh Mabiaa te thlawpna hnuaiah Sawmfela'n a hma bera chet nuam a ti hle.

Minute 36-naah vei lam kil aṭanga Dodoz-a pass chu MS-a'n goal-ah a pet nghal a, goalkeeper Liansangpuia'n dang mah se Mabiaa tan khung harsa a ni tawh lo. Minute li hnuah midfielder MS-a ball fing chu Mabiaa'n um lutin penalty area-ah keeper Sangpuia'n a titlu a, Ramhlun North keeper-in yellow card chauh a hmu hi a vannei hle. Penalty pet turin Sawmfela a pen chhuak a, tun season-a a goal kuana a khung.

Second half-ah Mabiaa a hmuhnawm chhunzawm a, Chanmari FC-in chak turin goal hnih a tawk tih an hriat bawk avangin goal an nawr chhunzawm tawh lo.

MPL kaithar tan a har

Ramhlun North FC-in MPL2 champion Chanmari FC khelh ṭhat ni an tawng hi an vanduai a, harsatna belchhah turin midfielder Zosangliana (Chhaia) leh defender C. Ramdinmawia an chhawr thei lo bawk.

Lalruatliana Sailo-in Ser-vices champion pui tawhtu Ram--niengmawia leh AIFF Aca-demy chhuak Lalramzauva Khiangte te inkhel bul ṭantu zingah dah mah se Chanmari tlarhnung khawng ṭha tak hmaah an tham ral. Nigerian forward Oneyama Francis-a'n second half-ah Chanmari foreigner Ugo tlan pel mah se crossbar a pet per avangin goal a khung bik lo.

Chanmari an khel ṭha

Ramhlun North coach Lal-ruatliana Sailo chuan, "Ka hmuh danin Chanmari FC khelh ṭhat ber ṭum a ni a, kan khelh chhiat ṭum a nih bawk avangin a harsa a ni. Tuna kan tih theih chu kan hmabak inkhel tura theihtawp chhuah a ni," tiin an khingpuite khelh ṭhat thu a sawi.

Chanmari FC coach Lalsang-zuala Hmar chuan, "Kan naute khelh danah ka lawm. Tuna ka player Rs 5 man hi season tharah chuan Rs 10 man an ni tawh ang. Kan tih theih chu rim taka thawh a ni a, a bak chu Pathian kut a ni," tiin a player-te chu ṭha zawka a chher thu sawi.

Chanmari FC-in an match hnuhnung berah Aizawl FC an hmachhawn ang a, hmahruaitu ni turin point khat bak an ma-mawh tawh lo. Ramhlun North-in Round 14-ah Dinthar FC an hmachhawn ang a, relegate pumpelh turin point khat an la mamawh a, relegation zone chhuahsan turin point thum an la mamawh thung.

Tute nge inlan?

Chanmari FC (4-3-3) : F. Lalmuanawma; MS Dawngzela (Thomas Lalengkima 71'), Lalrinchhana Tochhawng, Umunnakwe Ugochukwu Godswill, Ramfangzauva; R. Malsawmtluanga, Rochhingpuia, Lalrinchhana; Vanlalbiaa Chhangte (Lalrammawia 90+1'), Malsawmfela (Lalmuanzova 80'), Leonce Dodoz.

Ramhlun North (4-2-3-1) : Liansangpuia; Israel Laldingngheta, Lalramthlamuana, Lalmalsawma, Lalmuanawma; Lalramzauva Khiangte, Lalchhuanpuia (David Lalrinchhana 68'); Vanlalthlamuana, Isaac Lalruatpuia (Lalruatkima Dosel 68'), Ramniengmawia; Oneyama Francis Okechukinu.

ZoFooty Statistics

Chanmari FC 2 - 0 Ramhlun North FC

CFC : Vanlalbiaa Chhangte 36'; Malsawmfela 40'

MoM: Vanlalbiaa Chhangte, CFC

53% Ball Possession 47%

12 Shots 9

3 On Target 2

1 Yellow Cards 2

0 Red Cards 0

Powered By Rainbow Multibrand

Mobile Showroom