City tan Iheanacho?

Zanin dar 8:30 hian Selhurst Park-ah Crystal Palace-in Manchester City an mikhual dawn a, Pep Guardiola hote tan inkhel pawimawh a ni.

Manchester City-in Premier League-a West Brom 4-0 zeta an sawp hnuah Champions League-ah Barcelona 3-1 in an hneh zui bawk. Spanish manager Pep-a hote team danglam bik ang hiala ngaih ni hman mah se Middlesbrough lakah point khat chiah an hlawh a, hmahruaitu dinhmun aṭangin pathum-naah an tla thla bawk.

City hian Crystal Pa-lace lakah record ṭha tak an nei a, match hnuhnung 11-ah vawi 10 an chak. Eagles hian tun season-ah point 11 chiah an la hmu a, kum 2016 (calendar) chhunga an point hmuh dan record aṭanga teh phei chuan English league sang pali zingah anni aia point hmu chhia an awm lo.

Amaherawhchu April 2015 khan Selhurst Park-ah City hi 2-1 in an hneh a, Palace hian City champion nawn bei-seina an tihtawp sak. Hei hian City hi vanduai thei an nihzia a pholang a, chutihrualin match zawna point thum an hmuh loh nawn erawh a rinawm loh.

Eagles an hmachhawn dawn miau avangin City player ṭha rual zingah Nigerian forward Kelechi Iheanacho a langsar a, Nigerian forward hian Palace lakah hian Premier League-ah hming a chher ṭan. Nikum September thla khan Iheanacho hian minute 89-naah Wilfried Bony a thlak a, second 54 hnuah City tana com-petitive goal hmasa ber leh chakna goal a khung.

Hemi hnu hian League Cup-ah City-in Palace hi an hmachhawn leh a, Nigerian forward hian goal a khung leh bakah assist vawi hnih neiin 5-1 in hnehna an chang.

Kelechi chuan, "Crys-tal Palace hi City tana ka goal hmasa ber ka khung-na a nih avangin ka tan chuan an danglam bik a, Inrinni zana coach-in khelhna hun min pe a nih chuan pet goal leh ngei ka tum ang," tiin goal khung leh ngei a tum thu a sawi.