David Goffin lakah Novak Djokovic a chungnung

Novak Djokovic-a'n world number 1 ni chunga season khar a tumna kawngah hmalam a pan zel. World number 2 hian Ningani zan khan ATP World Tour Finals group match-a a game hnuhnung berah David Goffin a hneh.

O2 Arena, London-a inkhelah Grand Slam vawi 12 champion tawh Djokovic hian Belgian tlangval lakah 6-1, 6-2 in hnehna a chang. Djokovic hian a match hmasa pahnihah hnehna a chan tawh avangin Goffin a hmachhawn hma hian semifinal a lut chiang tawh. Ivan Lendl Group inkhel dangah Milos Raonic chuan Dominic Thiem chu 7-6 (7-5), 6-3 a hnehin a sang pali zingah a inhlangkai ve bawk.

Vawi nga champion tawh Djokovic chuan, "Match thum ka khel tawh a, tun ṭum hi ka khelh ṭhat ber ṭum a ni. Tennis inelna lian berte zinga miah buaina leh hlauhthawnna nei miah loin ka inkhelh theih a vangin a hmawr pawh ka bawk fuh ngei ka beisei," a ti. Djokovic hi a champion a nih chuan Andy Murray lak aṭangin world number 1 nihna a chhuhsak leh dawn a ni.

Kum 29-a upa Djokovic chuan sawi chhunzawmin, "Tournament hmaa ka sawi lawk ang khan thil a kaltluang em em a, semifinal khelh hmain ni khat hahchawlhna hun ka neih theih dawn avangin a lawmawm hle. Season kharna inkhelah hian ka theih tawp ka chhuah chhunzawm dawn a, eng nge lo thleng chu kan thlir ang," tiin a sawi.