Saints khelmualah hmahruaitu Liverpool
Kum 2008 hnua Premier League-a an season bul ṭan ṭhat ber hmangtu Liverpool-in zanin dar 8:30-ah Southampton an lenchilh dawn a, an hmahruaina chhawn nung zel turin Reds tan chak loh a thiang dawn lo - palina Arsenal nena an inthlauhna pawh hi khelh zat inangah point hnih chauh a ni.
Southampton-in an match hnuhnung bera Hull City an hneh loh hnuah insiamṭhat an tum dawn a, Claude Puel-a team-te hi team vantlang tia hriat ni mah se an khelmualah kher chuan lenchilh an chakawm loh - league hmahruaitu nih vanga pressure nei sang tur Reds player-ten champion an tum ngam tak tak leh tak tak loh a hriat ang.
Player inhliam
Brazil tan World Cup quali-fier khel tura a zin chhuah hnuah hliam nei chungin Anfield-ah Philippe Coutinho a kir a, Bra-zilian playmaker hi a hliam enfiah a nih hnuah Saints a hmachhawn theih a beiseiawm loh. Liverpool-in chanchin lawmawm loh dang an neih chu Adam Lallana inhliam thu hi a ni. English midfielder hi Spain laka goal a khung hnu lawkah a inhliam a, a club hlui hmachhawn thei lo dinhmunah a ding bawk.
Player pawimawh pahnih tel lo tur hi channa a nih rualin Jurgen Klopp tan lungngai taka indawm kunna tur erawh a ni lo - player pahnih hmun ruak luah tur hian Georginio Wijnaldum leh Daniel Sturridge an awm. English striker Sturridge-a'n Klopp-a hnuaiah hmun chang tam lo mah se striker goal khung thei tak a nih kha a la theihnghilh hman lo a, international break laiin England tan goal a khung - Saints defender tan ngaihnep ngawt chi a ni lo ang.
Coutinho a nghet
Liverpool-in Premier League nomawi an beisei mek laiin Coutinho-a'n khelmual pawn lamah chanchin a nei a, Barcelona leh Real Madrid lamah Brazil international hi kal tur anga sawi a ni. Mahse, Reds manager Jurgen Klopp chuan a player pawimawh chu Anfield-ah a hlim thu a sawi.
German coach chuan, "Cou-tinho hi he hmunah hian a nghet a, a hmalam hun pawh Liverpool-ah hian a awmah keini chuan kan ngai a ni. Phil hi kum 24 chauh a la ni a, hmasawnna tur a la ngah hle. A ṭhiante puihnain nitin a
ṭha telh telh a, tunah hian bul
ṭantir chauh a la ni," tiin league match-a goal nga khunga assist vawi nga nei tawh Coutinho chu a in zir tir chauhah a ngai.
Klopp chuan sum chu thil pawi-mawh ber a nih loh thu sawi-in, "A tawpa pawimawh ber chu sum a ni lo. Club dangin tuna kan pek let hnih hlawh tura ka player an thlem chhuak thei a nih chuan dal ka tum lo ang. Chhungkaw chawm tur nei ve tho anni a, ka player hnena a chhungkaw ngaihthah tura hrilh turin kei hi tu nge ka nih? Ka tum ber chu ka club chhuahsan chakna nei loa ka player-te siam hi a ni a, tun dinhmunah chuan ka player zingah chhuah chak tumah an awm lo," tiin a hlauthawng lo hle.
Reds dinhmun
Liverpool-in Premier League hmahruaitu ni turin match 11 an khelhah point 26 hlawh chhuakin goal 30 an khung. Nipui laia Southampton aṭanga Liverpool zawmtu Saido Mane chu Reds hmahruaina kawngah player pawimawh pawl niin goal ruk a khung tawh a, Saints tlarhnung ten an player hlui hi dan chah dan an ngaihtuah a ṭul dawn.
Roberto Firmino-a'n Liver-pool-a a season hmasa berah beisei phak lo mah se Brazilian striker hian tun season-ah a thiamna a pholang mek a, Reds tan a league match hnuhnung pasarihah goal nga khungin assist vawi thum a nei - Mane an venna lamah Saints tlarhnungin an ngaihthah chuan an tisual ang.
Liverpool tan hei erawh hriat reng a ṭul - Southampton hi khual-muala Manchester City in-hnehtawkpui thei team an ni a, Europa League aṭanga Inter Milan hnawt chhuaktu an ni bawk.