Madrid Derby Atletico khelmualah Real Madrid
La Liga champion beisei Atletico Madrid-in an match hnuhnung berah Real Sociedad 2-0 in an hneh lo a, hliam ngah vangin Real Madrid an talbuai mek thung - buai dan in ang lo team pahnih hi zanin dar 1:15-ah an inhmachhawn dawn a, Madrid Derby-ah chak lo zawk nih an duh lo ve ve ang.
Zidane-a buaina
Real Madrid manager Zine-dine Zidane-a'n duhthlang thei ni ngat se player hliam a ngah laia Atletico khelmuala lenluh hi chu a thlang lo tawp ang. Real hian hliam vangin Casemiro, Pepe, Toni Kroos leh Alvaro Morata an chhawr thei dawn lo a, Karim Benzema chuan nimin khan club training zawm leh tawh mah se Madrid Derby em hmachhawn tur chuan a la rintlak kher lo ang.
French manager Zidane-a'n player hliam a ngah miau avangin an khelh dan a siksawi nual a ngai dawn a, 4-3-3 formation a hman rin a ni. Real midfield-ah Croatian midfielder pahnih Mateo Kovacic leh Luka Modric bakah Isco a chhawr rin a ni a, field sir lamah Gareth Bale leh Lucas Vazquez an inkawp beisei niin James Rodriguez leh Marco Asensio an la awm bawk. Striker pahnih Benzema leh Morata an inhliam miau avangin Cristiano Ronaldo chu Portugal tana a khelhna ṭhin striker-ah chhawr a nih rin a ni.
Griezmann-a dam
Zidane-a'n player inhliam vanga ngaihtuah buai tur a ngah laiin Diego Simeone tan erawh thawk huaina tur thil a thleng a, Zirtawpni zana France-in Sweden 2-1 a an hneh ṭuma inhliam Antoine Griezmann chuan club training a zawm leh tawh a, Real a hmachhawn dawn - tun season a goal riat khung tawh forward hmachhawn hi Real tlarhnungin an chak lo tawp ang.
South America lama World Cup qualifier khela thang bo zingah Filipe Luis, Diego Godin, Jose Gimenez, leh Angel Correa te chuan buaina nei loin Atletico training an zawm leh tawh bawk a, tun hnaia player che ṭha tak Yannick Ferreira Carrasco bakah tawnhriat ngah tawh striker Fer-nando Torres an la kawl cheu bawk avangin an bu zawla Atletico hneh hi dam kim lo Real tan hna harsa a ni dawn.
Hmanah chuan
Madrid Derby vawi 55 khelh tawhah Real Madrid an ropui zawk a, vawi 32 hnehna changin vawi kua an tlawm a, vawi 14 chu chak zawk awm loin an inṭhen thung. Tun hnaia team pahnih lo intawn tawh dan thlir erawh chuan Atletico fan-te chu thlamuang zawk an nih ngei a rinawm - La Liga a team pahnih intawn hnuhnung vawi rukah Atletico an chak vek.
Real Madrid manager zinga Diego Simeone enkawl team La Liga-a hneh thei awmchhun chu Jose Mourinho chiah a ni! Atletico hian an khelmuala league match an khelh hnuhnung vawi 22-ah tlawm hmel an la hmu miah lo bawk - Real tan thil hriat nuam a ni hauh lo ang.
Simeone vs Zidane
Khawvela manager duh-awm an sawi apiangin Diego Simeone leh Zinedine Zidane hming lamrik a ni ṭhin a, nikum Champions League final-ah khan manager pahnih hi intawng tawhin Zidane a chungnung zawk - Argentine manager Simeone-a'n ani aia tawnhriat nei tlem zawk manager lakah tlawm nawn a duh lo ang.
Diego Simeone-a'n a vang-laiin Atletico Madrid tan a khel
ṭhin a, Real Madrid tana Zine-dine Zidane ropui ṭhinzia hi sawi nawn ngai a ni lo - coaching huang chhungah erawh Simeone hi Zidane chunga leng a ni a, La Liga Coach of the Year ṭum thum ni thei coach hian French manager aia a tawnhriat ngahna lantir ngei a tumin a rinawm.