Payet chungchangah Bilic hlauthawng lo

West Ham manager Slaven Bilic chuan January transfer-ah an player pawimawh Dimitri Payet a chhuah a rin loh thu a sawi.

Croatian manager Bilic chuan, "Payet-a chungchang hi ka chhiar a, thil lianthamah ka ngai lo. Chhuah theihna tur kawngka khar duh lo mah se January emaw June thla emaw chhuah a tum thu a sawi chuang lo. Payet-a chungchangah hian hlauhthawnna ka nei lo a, player ṭha hi chuan chanchin an ngah hrim hrim a ni," tiin French midfielder chungchang a sawi.

Hammers hian zanin dar 11:00 hian White Hart Lane-ah Tottenham Hotspur an lenchilh dawn a, Bilic-a hote hian match 11 khelh tawh
aṭanga point 11 chiah an la hmuh avangin table-ah 17-naah awmin tla thei dinhmunah an ding mek.

Tottenham Hotspur chiah hi tun season Premier League-a hneh loh la tawng lo awmchhun an ni a, amaherawhchu match ruk zet an khingpuite an draw tawh avangin table-ah panganaah an awm mek. Spurs tana thu lawmawm chu Harry Kane-a'n a ngalrek a tih nat vanga hun rei tak a inhliam hnuah North London derby-a Arsenal an draw
ṭum-in penalty aṭangin an siphurh a sut.

Spurs coach Mauricio Pochet-tino chuan, "Harry leh Christian hian inhliam vangin harsatna an nei tawh lo a, West Ham hmachhawn turin a inpeih ang," tiin an striker bakah Danish midfielder Christian Eriksen te an dam ṭhat thu a sawi.

Amaherawhchu inhliam vangin Dele Alli dinhmun a chiang lo a; Toby Alderweireld (khup), Ben Davies (ngalrek) leh Erik Lamela (khel bawr) te erawh an la inlan thei dawn lo.