Tlawm duh lo Chhinga Veng an kal zel

Goal thun tuma vawi 27 zet an pet/tauhna inkhelah Chhinga Veng FC-in Dinthar FC 2-1 in an hneh. Round 8-a a hnuai bera awm Chhinga Veng chu panganaah invawrh chhoin November 24 zana Chanmari West FC an hneh chuan semi final an lut ang.

Nimin tlai Lammuala Mizoram Premier League inkhel pawimawhah hian first half-a Dinthar-in Cho Tshering Lepcha hmanga goal an thun chu second half-a minute hnih chhungin Lalkhawpuimawia leh Ronald Zothanzama-te'n an chhâng let a, Chhinga Veng goal thuntu pahnih hi Dinthar player hlui an nih bakah rei tak inhliam hnua lo kir leh ve ve an ni.

Round 9 aṭanga hneh loh tawng lo Chhinga Veng hian point 16 hmuin point 18 hmutu Chanmari West nen round hnuhnung berah inkhelin palina nih an inchuh dawn. Point 13 hmu Dinthar tan relegation playoff pumpelh turin round hnu-hnung berah an ṭan a la ngai dawn a, an khingpui tur chu an hnuai chiaha awm Ramhlun North an ni!

A hming chu Cho

Dinthar FC leh Chhinga Vengin chak pawimawh zia an hria a, an ṭan luatah awmze neiin goal an nawr thei lo ve ve. MPL kaithar Chhinga Veng an chungnung hret a, Vanlalthanga cross ball-in Dinthar defender VL Chhanhima kut per mah se penalty pek an ni lo.

Minute 40-naah Dintharin an corner hmuh an hmang ṭangkai a, buai nuaih kara ball chhuak chu Cho chuan a volley goal. Hemi hnua Dinthar defender Zothanzuala ball pet pawh a goal teuh viau bawk. First half zawhah Dinthar ṭantute an lâm!

Kelkang harhna

Chhinga Veng coach Chawng-thansanga'n chak tumin Lalkhaw-pui-mawia a rawn luhtir a, Kelkang tlangval hian minute 48-naah Emma Chigozie freekick chu a tauh goal nghal. MPL kaithar an phur zui a, damkawr Ronald-a'n minute hnih hnuah vei lam kil aṭangin freekick a pet goal.

Bawngkawn tlangval Ronald hian a club hlui Dinthar lama khung ni mah se goal pawimawh a khung avangin Chhinga Veng mipui nen a goal khung hi a lawm. Hemi hnu hian match thum a zawna goal khung tawh MS Dawngliana'n goal ban leh crossbar a pet per leh bawk.

Dinthar lamin keeper Joseph chu inhliam vangin an thlak a, substitute Isak Lalmuanpuia boruak sangah pressure ngah vangin a khel ṭha thei lo. Minute 80-naah Dinthar midfielder Lalbiaknia Pautu red card a hmu chung pawhin Chhinga Veng tan Mapuia leh captain Joseph-a ten an hun ṭha neih an hlah avangin hun tawp thlengin an buai phah.

Kut rangkachak

Dintharin chak an duh avangin Balogun Hammed pawh goal nawr turin an dah chhuak a, Chhinga Veng defender Emma Chigozie a
ṭangkai hle.

Injury time-ah subsitute Samuel Laltlanthanga'n hnai tak aṭangin a pet a, Chhinga Veng keeper R. Lalhmangaihzuala'n mak takin a dang hman. Lengpui tlangval kut hi Chhinga Veng tan chuan kut rangkachak a ni a, an vanneihna belchhah turin hun tawp hma hretin Dinthar forward Lalruatpuia'n hnai tak aṭangin a hlah zui.

Min hrethiam ru - Chawnga

Chhinga Veng coach Chawngta chuan, "Kan lawm dan hi ka sawi thiam lo, tla thei dinhmun aṭanga semifinal kan thleng thei dinhmuna kan ding thei hi a mak. Match hnuhnung berah ka club hlui Chanmari West ka hmachhawn dawn a, an veng mipui pawhin min duhsak em em a, tunah erawh min hriatthiam a ṭul a ni," tiin Chanmari West hneh an tum thu a sawi.

Ka thiam loh a ni - Lalhlua

Dinthar FC coach Lalhlupuia Sailo chuan, "Ka mawhpurhna a ni a, player-te mawhphurhna a ni lo. Mihring hi tlu reng tur kan ni lo a, thawh leh nachang hre lo chu mi a an ni. Match hnuhnung berah thawh leh ngei kan tum ang," tiin Ramhlun North hneh ngei a tum thu a sawi ve bawk.

The great escape!

Round 8 a zawhin Chhinga Veng hian point 5 chiah an la hmu. round 13 a zawh chuan point 16 an hmu ta. Tunah chuan tlak hlauhna a bo a, semi final luh beiseina a nung thar.

Round 9-ah Zo United 3-0 a hnehin an insiam ṭha a, Round 10 leh 11-ah Ramhlun North leh Chanmari FC an draw avangin an ngui. Round 12-ah hmahruaitu Bethlehem Vengthlang 2-0 hnehin beisiena an nei a, an boruak ṭha chhunzawmin Dinthar an hneh zui - semi final an thleng thei a nih chuan 'champion' pawh an sawi ri ngam ang - Chanmari West hneh phawt erawh a ṭul ang a, a awlsam hauh lo ang.

Tute nge inlan?

Dinthar FC (4-3-3) : Joseph C. Lalruatfela (Isak Lalmuanpuia 56'); Steve Lalnunmawia, Balogun Hammed, VL Chhanhima, Zothanzuala; Clarence Carter, Saihmingthanga, Lalbiaknia; Lalruatpuia, Michael Lalremruata, Cho Tshering Lepcha (Samuel Laltlanthanga 87').

Chhinga Veng (4-3-1-2) : R. Lalhmangaihzuala; Ronald Zothanzama (R. Laldinliana 58'), K. Lalhlahlova, Emma Chigozie, Lalramfelpuia; Paul Ramfangzauva, Joy Mrong Khar Raswai (Lalkhawpuimawia 46'(Lalthlamuana 90+4')), Vanlalthanga; MS Dawngliana; Joseph Lalnunpuia, Vanlallawma.

ZoFooty Statistics

Dinthar FC 1 - 2 Chhinga Veng FC

DFC : Cho Tshering Lepcha 40'

CVFC: Lalkhawpuimawia 48'; Ronald Zothanzama 50'

MoM: Emma Chigozie, CVFC

50% Ball Possession 50%

13 Shots 14

7 On Target 5

3 Yellow Cards 0

1 Red Cards 0

Powered By Rainbow Multibrand

Mobile Showroom

Team Dinhmun

# Team Pld W D L GF GA GD Pts

1 Chanmari FC 13 7 5 1 23 11 12 26

2 Bethlehem VT 12 7 2 3 12 10 2 23

3 Aizawl FC 12 6 2 4 13 9 4 20

4 Chanmari West 13 5 3 5 18 15 3 18

5 Chhinga Veng 13 4 4 5 18 17 1 16

6 Dinthar FC 13 2 7 4 15 19 -4 13

7 Ramhlun North 13 3 3 7 12 20 -8 12

8 Zo United 13 1 6 6 11 20 -9 9