MPL U18 final-ah West Warrior

Flying Christabel Mizoram Premier League Under 18 semifinal-ah Chanmari West FC-in penalty shootout hmangin Aizawl FC an hneh. West Warrior hian final-ah Bethlehem Vengthlang FC an hmachhawn ang.

MPL U18 final hi November 22, Thawhlehni zan dar 7:00 hian Lammualah khelh a ni dawn a; league round-ah West Warrior leh BVT hi 3-3 in an inhnehtawk.

Nimin tlai semifinal hmuh-nawm takah hun pangngaiah goal a lut lo a, Chanmari West hi penalty shootout-ah 4-3 an chak.

Goal a lut lo

Aizawl FC Under 18 player eng-emaw zatin Aizawl DFA hnuai first division-ah AFC Academy tan an khel a, Chanmari West FC Under 18 lam hi first division-ah 1st Bn MAP Academy lama awm an ni bawk.

West Warrior-in goal chhuah an tum lo tih an khelh dan aṭangin a lang a, coach Lalramhluna game plan a hlawhtling. Aizawl FC-in hun chanve hma lamah goal khungna chance an nei lo.

Second half-ah Chanmari West forward Lalenkawla'n goal khungna hun ṭha a nei a, goalkeeper Sangtluanga insiamrem hman tawh lo mah se AFC defender Malsawmtluanga'n (Valpuia) Serchhip rawlthar Enkawla pet a dang hman. West Warrior-in goal khungna hun ṭha an ngah zawk a, C. Lalthansanga leh Lalṭhakima ten an hun ṭha neih an hlah ve ve.

AFC lamin West Warrior defender handball (?) vangin penalty an beisei a, pek an ni lo. Hun tawp hma hretin Chanmari West forward Enkawla'n penalty a hlawh chhuak a, amah ngeiin pet nghalin a pet goal lo a, hun a tawp zui bawk.

Penalty chu

West Warrior tan Enkawla bawk a rawn pen chhuak a, goal-ah chantir tawh mah se a vawi hnihna pettu Lalrinpuia'n a hlah zui avangin Aizawl FC dinhmun a ṭha. Amaherawhchu MPL kum naupang inelnaa record ṭha nei lo AFC tana pet hnuhnung pahnih Valpuia leh Lalremmawia ten an hlah a, penalty shootout-ah Chanmari West 4-3 in an chak.

Eng nge an sawi?

Aizawl FC U18 assistant coach H. Lalnunzira chuan, "First division kan khelh tel avangin kan chau a, penalty hmuh theihna tur pek kan ni lo bawk. Engpawh chu ni se penalty hi chu vanneih leh vanduai inkar a ni a, kan vanduai zawk a ni," tiin a sawi.

Chanmari West U18 coach Lal-ram-hluna chuan, "Kan keeper Lal-rinchhana kan rintawk avangin penalty kha kan cho hrim hrim a, chumi mil chuan game plan pawh kan siam. Hun pangngai a penalty kan hlah avangin kan vanduai a, penalty shootout-ah erawh kan vannei," tiin a sawi.

ZoFooty Statistics

Aizawl FC 0 - 0 Chanmari West FC

Penalty Shootout-ah Chanmari West 4-3 in an chak

11 Shots 14

5 On Target 8

3 Yellow Card(s) 2

0 Red Card(s) 0

Powered By Darchiauva Hardware

Penalty Pet Dan

Chanmari West Aizawl FC

Enkawla G Lawma G

Rinpuia X Tluanga G

Ruatpuia G Rintluanga G

Thakima G Valpuia X

Sanga G Terema X

Chanmari West 4-3 in an chak

Note : G = Goal; X = Goal lo.