Old Trafford-ah Arsenal fiahin an awm dawn
Zanin dar 6:00 hian Manchester United khelmual hmanthiam Old Trafford-ah Arsenal an lenglut dawn. Gunners manager Arsene Wenger-a'n tun hma lama a ngam loh ṭhin Jose Mourinho leh khawvela player manto ber Paul Pogba a hmachhawn dawn.
Premier League club lian pahnihte hi inelna hrang hrangah vawi 223 an inhmachhawn tawh a, United chu record nei ṭha zawk niin vawi 94 an chak tawh. Arsenal-in vawi 80 hnehna chang tawhin ṭum 49 dang chu an inhnehtawk thung.
Old Trafford-ah hian league match-ah bik kum 2006 September thla hnuah Gunners hian hnehna an la chang leh lo. An intawn hnuhnung ber chu February thla kha niin Marcus Rashford-a'n United tana a league match hmasa ber a khelh
ṭum hian goal hnih khung nghalin a club hi 3-2 in a chakpui.
Hliam leh dam
Tun season kal mekah striker palian Zlatan Ibrahimovic chu yellow card vawi nga a hmuh tawh avangin a inlan thei dawn lo a, kum 18-a upa Rashford a pawimawh leh ang. United hian Ibra bakah hian hliam vangin Eric Bailly leh Antonio Valencia te an la chhawr thei dawn lo a, Marouane Fellaini leh hliam vanga international match khel lo Chris Smalling leh Luke Shaw te dinhmun a chiang lo bawk.
Arsenal tan Alexis Sanchez a inlan thei mai thei. Chile international hi Wenger-a'n inkhel lo turin la duh mah se Uruguay hmachhawntir a ni a, goal hnih a khung. Mahse, Wenger-a'n a player pawimawh hi a chhawr ngei dawn em tih a la sawi chiang thei lo thung.
Defender Hector Bellerin chu a ke rek na vangin a inlan thei dawn lo thung. Spain international hi Tottenham nen 1-1 a an inhnehtawk ṭumin a hliam a, kar li vel a chawlh a ngai dawn. Gunners midfielder pawimawh Santi Cazorla dinhmun a la chiang lo a a, captain Per Mertesacker leh Red Devils striker hlui Danny Welbeck te chu hliam vanga inkhel thei lo tur chiang sa an ni bawk.
Wenger a buai lo
Arsenal manager Wenger leh Mourinho te hi tun hma lamin league leh cup inelnaah vawi 13 an lo inhmachhawn tawh a, hengah te hian Chelseas manager hlui Mourinho hian record a nei ṭha fal hle; vawi sarih hnehna changin vawi ruk an inhnehtawk - chak loh a nei lo. Wenger-a'n hnehna a chan awmchhun chu 2015 Community Shield chiah kha a ni.
Wenger chuan, "Manager pa-hnih inkar sawi a ṭulna ka hre lo. Ani chuan a team tan a bei dawn a, kei pawhin theih tawpin kan team tan ka bei ang. A zawnin match 16 chhung chu hneh loh nei loin kan kaltluang tawh a, league hmahruaitu nei thei turin hnehna chan kan tum ang," tiin a sawi.
Rooney a damlo?
England manager lailawk Gareth Southgate-a'n World Cup qualifying-a Wayne Rooney a chawr loh chhan chu hliam vang a nih thu a sawi. Rooney hian Arsenal a hmachhawn theih dawn leh dawn loh a la chiang lo thung. Sulhnu thlirkirin Wenger-a tan Rooney ven dan zir lawk a ṭul.
United captain Rooney-a'n season duhawm hmang rih lo mah se Gunners hmachhawn tur chuan ani aia rintlak an awm kher lo ang. England international hian league match-ah Arsenal goal-ah vawi 14 a khung tawh a, Aston Villa (15) tih lohah chuan an khingpui laka a khung hnemna ber a ni.
Kum 31-a upa Rooney hian Premier League-a a goal hmasa ber chu Arsenal lakah a khung a, United tana a goal hmasa ber leh mel lung pawimawh a phunna league goal 100 a khungna pawh Arsenal lakah tho a ni bawk.
Zanin Inkhel Tur
Manchester United 6:00 PM Arsenal
Crystal Palace 8:30 PM Manchester City
Everton 8:30 PM Swansea City
Southampton 8:30 PM Liverpool
Stoke City 8:30 PM AFC Bournemouth
Sunderland 8:30 PM Hull City
Watford 8:30 PM Leicester City
Tottenham Hotspur 11:00 PM West Ham United
November 20, Pathianni
Middlesbrough 9:30 PM Chelsea
November 21, Thawhtanni Zan
West Bromwich 1:30 AM Burnley