KHAWTHLIR

Thisen pe

November 19, 2016 khan Aizawl Civil Hospital tan Zonuam Bial KṬP-in thisen unit 40 an pe a, a petute mipa 36 leh hmeichhia pali an ni a; SAY Ebenezer Corps-in unit 36 pein, a petute mipa 35 leh hmeichhia pakhat an ni. Bawngkawn Bethel Bial KṬP pawhin Synod Hospital tan unit 31 pein, a petute mipa 26 leh hmeichhia panga an ni a; Champhai Vengthlang North Branch KṬP-in Champhai District Hospital tan unit 20 an pe bawk a, a petute mipa 14 leh hmeichhia paruk an ni.

Member-ah ruat

Forensic Science Laboratory director H Sang-chungnunga chu Ministry of Home Affairs hnuaia National Crime Record Bureau (NCRB) chuan November 16-26, 2016 chhung All India Fingerprint Exam neih mekah a vawi hnih­na atan board member pathum zinga pakhat atan a ruat. Finger print exam hi kum tin buatsaih a ni a, a tlingte chauh finger print expert-ah pawm an ni.

Kawng siam

Siaha District Commercial Vehicle JAC bul tumin Inrinni khan Siaha khawpui chhunga kawngpui chhe zual lai hnatlangin an thawm ṭha a; anmahni sumin kawng hnawhna tur cement, balu leh rora an lei. Lawngtlai District Commercial Vehicles JAC pawhin Inrinni khan Lawngtlai Areopagi aṭanga Council Venga FCI kudam panna kawng khuar lai chhe zual laite hnatlangin an thawm ṭha a; kawng siam nan hian Kaladan Multi Modal Transit Transport Project kawng siamtu, RDS company-in tipper pahnih leh lung an thawh a, PWD-in roadroller an thawh bawk.

Duty post hawng

Aizawl khawpui chhim lama veng hrang hranga YMA branch 16 intél­khawmin ruihhlo do beihpui thlakna atana headquarters atana an siam, Mission Veng South Branch YMA Duty Post chu Inrinni khan Central YMA treasurer J Lalsailova'n a hawng. Aizawl South Joint Operation hian ruihhlo do beihpui an thlak
ṭan tawh a, November 15 zan khan Thak­thing Veng Zawlbuk­ah CYMA assistant secretary R Lalngheta'n a hawng a ni.