Atletico Madrid ngam loh Ronaldo
Kum 31-a upa ni tawh mah se Cristiano Ronaldo-a'n a thiam a theihnghilh thei lo - Inrinni zan khan Portugal cap-tain hian Madrid Derby-ah hattrick siamin a team Real Madrid chu 3-0 in hnehna a chanpui.
Ronaldo hian minute 23-naah freekick aṭangin Atletico goalkeeper Jan Oblak rin loh lamah goal hmahruai a khung a, minute 71-naah penalty aṭanga a goal hnihna khungin Gareth Bale-a siamsak hmangin a goal thumna a khung - Manchester United forward hlui hian a career-ah hattrick vawi 39-a siam tling ta!
Atletico-in an khelmualah Madrid an ngam loh avangin La Liga nomawi an beiseina a chuai a, table chung bera awm Zinedine Zidane-a naute hi point kua zetin an phak tawh lo.
Ronaldo a tar lo
Ronaldo-a'n tun thlatir khan Real Madrid-ah June 2021 thleng cham turin contract thar a ziak a, Portuguese forward hian a contract zawh hun chu a tawpna tur a la nih loh thu sawiin kum 40 thleng a inkhelh theih a beisei thu a sawi!
Atletico laka a khelh dan enin Ronaldo hi rawlthar tha za ang maiin a tal a, Atletico player-ten chelh ngaihna an hre lo a ni ber - first half tir lama a goal khungna hun ṭha neih Oblak-a'n dive ropui hmangin dan sak lo ngat phei se chuan goal thum aia tam khung thei a ni.
Ronaldo hian hattrick a siam rual khan Madrid Derby-a goal khung hnem ber ni ṭhin Real legend Alfredo Di Stefano goal khung zat 17 chu goal khatin a khum chiah bawk - record thar a la siam dawn chauh niin a lang.
Zidane thukhawchang
Real Madrid coach Zidane chuan, "A tir aṭangin game harsa tak a ni a, mah se game kan thunun hneh avangin ṭha takin bul kan ṭan thei a ni. Kan khelh danah ka lawm a, hetiang ang khelmuala 3-0 a hnehna chan hi thil awlsam a ni lo," tiin a naute khelh dana a lawm thu a sawi.
Messi tel lohna Barca
Barcelona-in Inrinni zanah an thiampuipa Lionel Messi leh Luis Suarez tel loin Malaga an mikhual a, goal khung loa an inhnehtawk avangin an goal khung khawl pahnih hi an mamawh tih hmuh hmaih rual a ni lo - Argentina captain Messi-a'n dam lohna avangin inkhel a hmachhawn thei lo a, Uruguayan striker Suarez hi hrem a nih vanga inlan thei lo a ni.
Malaga hian second half minute 68-naah Diego Llorente hnawhchhuah a nih avangin kim loin minute 20 chuang an khel a, injury time-ah Juan Carlos hnawhchhuah leh ni bawk mah se tlem zawk nichungin Barca an chelh thei a, Messi leh Suarez awm loh an vanneih pui tel bawk.
Barcelona boss Luis Enri-que chuan, "Messi leh Suarez tel loin kan khel ngei a, mah se hnehna chang ṭhin chu mimal niloin team a ni. Malaga kha an player 10 velin goal an veng reng a, hmun awl insiam tum ṭhin mah ila khatiang a nih chuan a harsa a ni. Ka player leh fan-te ka fak a, a tawp thlengin beidawng loin kan bei a ni," tiin chak lo mah se lawmna tur a neih thu a sawi.