Bayern ngam loh Aubameyang

Bundesliga-ah Carlo Ancelotti en-kawl Bayern Munich hneh loh nei loa an kaltluang lai chu a tawp ta. Pierre-Emerick Aubameyang-a'n tun season-a a goal 12-na khungin Borussia Dortmund chu Bayern lakah 1-0 in hnehna a chanpui.

Inrinni zan Sig-nal Iduna Park-a inkhelah Gabon international Aubameyang hian ṭan aṭanga mi-nute 11-na lekah inkhela goal awmchhun a khung. Nipui transfer laia an lakluh Mario Gotze cross chu hnai set sawt aṭangin a tlawh lut.

Bayern hi second half-ah insiam ṭhain an nawr let na viau a, winger Frank Ribery goal khung chu offside vangin pawm a ni lo. Xabi Alonso-a'n crossbar a tih per bakah striker Robert Lewandowski ball tauh chu goal hrulah a liam.

Bundesliga-ah Dortmund hian kum 2012 April thla hnuah Bayern hi an mahni khelmualah an vawi khat hnehna a ni. Thomas Tuchel-a naute hian match 11 khelh aṭanga point 21 hmuin pathumnaah an awm lailawk a, an elpui Bayern nen an inthlauhna chu point thum chiah a ni ta.

Hmahruaitu Leipzig

Kai thar RB Leip-zig mumang ramah an cheng chhunzawm zel. Inrinni zan khan Emil Forsberg leh Willi Orban te goal khung bakah Julian Baumgartlinger-a'n an mahni lama a tih luh hmangin khualmualah Bayer Leverkusen 3-2 in an hneh.

Kum 2009-a din Leipzig hian Bundesliga an khelhna hmasa berah hian match 11 an khelh
aṭangin point 27 an hmu tawh a, champion lai Bayern Munich nen khelh zat inangah point thumin hma an hruai mek!