Delhi tan Sawmtea goal a tawk lo

Zirtawpni zan Indian Super League inkhelah Mizo rawlthar Malsawmzuala'n goal khung mah se Pune City lakah a team Delhi Dynamos a chhanhim zo lo a, 4-3 in an tlawm. Pune-a inkhel hmuhnawm takah Delhi tan Kean Lewis-a'n goal hmahruai a khung zet hnuah Pune City-in Anibal Rodriguez goal hnih leh Mohamed Sissoko hmangin an chhanglet a, minute 78 thleng chu 3-1 a ni.

Delhi-in minute 79-naa Eduardo Ferreira own-goal hmangin bei-seina nei thar ve leh mah se sub-stitute Lenny Rodrigues-a'n Pune tan an goal lina a khung a, injury time-a Chaltlang rawlthar Sawmtea goal khungin awmzia a nei tawh lo. Delhi tan hian Aizawl FC keeper hlui Soram Poirei chuan penalty a dang bawk.

Hei le Forlan!

Mumbai City-in Inrinni zan khan an mikhual Kerala Blasters lakah zahngaihna an lantir duh lo a, Diego Forlan hattrick siam hmangin Kerala hi 5-0 zetin an sawp. Manchester United striker hlui Forlan hian first half-a goal hnih a khung hnuah second half-ah goal khat a khung leh a, Cafu leh Lucian Goian ten goal khat ve ve an thawh ve bawk.

Mualneitu team tan ṭum dang ang bawkin Lalhmangaihsanga Ralte chuan inkhel bul a ṭan a, hliam vanga rei tak a inlan theih loh hnuah Lalchhuanmawia Fanai chuan tun season ISL-a a match hmasa ber chu bench aṭanga tlan lutin a khel ve bawk.